पूर्वप्रधानमन्त्री तथा नेपाली कम्युनिष्ट पार्टी (नेकपा) का वरिष्ठ नेता झलनाथ खनालले आफूलाई पार्टी फुटाउने वा नयाँ दल गठन गर्ने कुनै इच्छा नरहेको स्पष्ट पार्नुभएको छ।
सोमबार काठमाडौंमा आयोजित ‘वैज्ञानिक समाजवाद कि बहुदलीय समाजवाद’ नामक पुस्तक विमोचन कार्यक्रममा बोल्दै उहाँले जीवनभर गुटबन्दीको विरोध गर्दै आएको व्यक्ति भएकाले पार्टी विभाजन गर्ने वा नयाँ पार्टी खोल्ने कुरा निराधार भएको बताउनुभयो।
नेता खनालले वर्तमान लोकतान्त्रिक व्यवस्थाको अधिकतम उपयोग गर्दै समाजवादी लोकतन्त्र स्थापना गर्न समाजवादी क्रान्ति र रूपान्तरण आवश्यक रहेको धारणा राख्नुभयो। उहाँले आन्दोलनभित्र देखिएका विकृति, असमझदारी र विचलनलाई वैचारिक बहसमार्फत समाधान गर्नुपर्ने आवश्यकता औँल्याउनुभयो।
उहाँले आफूले लेखेको पुस्तक ‘वैज्ञानिक समाजवाद कि बहुदलीय समाजवाद’ यिनै वैचारिक प्रश्न र बहसलाई स्पष्ट पार्ने उद्देश्यले तयार गरिएको बताउनुभयो।
खनालले आफ्नो नाम जोडेर फैलाइएका पार्टी फुटाउने र नयाँ दल खोल्ने हल्लालाई ‘कुप्रचार’ भन्दै भ्रममा नपर्न आग्रह गर्नुभयो।
Discussion about this post