शेयर बजार लगातार चौथो कारोबार दिन घटेको छ । शेयर बजार परिसूचक नेप्से आज ८ दशमलव ५० अङ्कले घटेर २ हजार ६५१ दशमलव ५२ विन्दुमा झरेको छ ।
नेप्से चार महिनायताकै न्यून विन्दुमा पुगेको हो । गएको फागुन १३ गते नेप्से २ हजार ६४८ विन्दुमा रहेको थियो ।
नयाँ सरकार गठन भएयता नेप्से झन्डै ३०० अङ्कले घटेको छ । बालेन्द्र शाहले गएको जेठ १३ गते प्रधानमन्त्रीको शपथ लिँदा नेप्से २ हजार ९५० विन्दुमा रहेको थियो ।
आज उत्पादन तथा प्रशोधन समूहबाहेक सबै उपसमूहको सूचक घटेको छ । व्यापार समूहको सूचक सबैभन्दा बढी झन्डै २ प्रतिशतले ओरालो लागेको छ ।
आज १७२ वटा कम्पनीको शेयर मूल्य घटेको छ भने ८३ वटा कम्पनीको बढेको छ । १९ वटा कम्पनीको शेयर मूल्य स्थिर रहेको छ ।
आज भुजुङ हाइड्रोपावरको शेयर मूल्य सबैभन्दा धेरै ११ प्रतिशतले घटेको छ । समग्र बजार घटेको दिन टक्सार पिखुवा खोला हाइड्रोपावर र याम्बलिङ हाइड्रोपावरको शेयर मूल्य १५ प्रतिशतले बढेको छ ।
नेप्सेसँगै कारोबार रकम पनि घटेको छ । हिजो ४ अर्ब ४१ करोड रुपैयाँको कारोबार भएकोमा आज ३३८ वटा कम्पनीका शेयर किनबेच हुँदा कुल २ अर्ब ६४ करोड ८० लाख रुपैयाँ बराबरको कारोबार भएको छ ।
यो कारोबार रकम जेठ ४ गतेयताकै कम हो । त्यस दिन २ अर्ब ४५ करोड रुपैयाँको शेयर कारोबार भएको थियो ।
Discussion about this post