राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनअन्तर्गत पहिलो चरणमा आज केन्द्रीय सदस्यका लागि मतदान सुरु हुँदैछ। चितवनको भरतपुरमा जारी महाधिवेशनमा ९९ केन्द्रीय सदस्यका लागि झन्डै ४०० जनाले उम्मेदवारी दिएका छन्। महामन्त्री कविन्द्र बुर्लाकोटीका अनुसार दाबी विरोध र उम्मेदवारी फिर्तापछि अन्तिम सूची प्रकाशित गरिनेछ।
उम्मेदवारको विवरण रुजु गरी विद्युतीय भोटिङ मेशिनमा प्रविष्ट गर्ने काम भइरहेको छ। मतदानका लागि ८० वटा विद्युतीय उपकरण तयारी अवस्थामा राखिएको छ। विभिन्न ‘क्लस्टर’ बाट उम्मेदवार कायम भएकाले मतदान प्रक्रिया केही समय लम्बिन सक्ने अनुमान गरिएको छ।
केन्द्रीय निर्वाचन आयोगका प्रमुख भुवन केसीका अनुसार मतदान सम्पन्न भएको दुई घण्टाभित्र नतिजा सार्वजनिक गरिनेछ। विदेशमा रहेका प्रतिनिधिले मोबाइलमार्फत मतदान गर्ने व्यवस्था गरिएको छ। महाधिवेशनमा ४ हजारभन्दा बढी प्रतिनिधि सहभागी छन्।
यसअघि नै पार्टी सभापतिमा रवि लामिछाने निर्विरोध चयन भइसकेका छन्। महामन्त्री बुर्लाकोटीका अनुसार आजै रातिसम्म केन्द्रीय सदस्यका लागि पहिलो चरणको मतदान सम्पन्न गरी दोस्रो चरणमा पदाधिकारी चयन गर्ने तयारी छ।
दोस्रो चरणमा १ उपसभापति, २ महामन्त्री र ३ सहमहामन्त्री गरी ६ पदका लागि निर्वाचन हुनेछ।
यसैबीच महाधिवेशनमा सहभागी हुन चितवन पुगेका पार्टीका वरिष्ठ नेता एवम् प्रधानमन्त्री बालेन्द्र शाह (बालेन) आज काठमाण्डौ फर्किनुभएको छ। गत आइतवारदेखि सुरु भएको रास्वपाको पहिलो महाधिवेशन हिजो नै सकिनुपर्ने कार्यतालिका भए पनि प्रक्रिया लम्बिएको छ।
Discussion about this post