कैलाली । अनलाइन टिभी पत्रकार सङ्घ नेपाल सुदूरपश्चिम प्रदेशका महासचिव तथा वैज्ञानिक मिडियाका प्रबन्ध निर्देशक टिकाराम साउद सम्मानित भएका छन्।
कैलालीको बर्दगोरिया गाउँपालिका को १८औँ गाउँसभाको अवसरमा साउदलाई पत्रकारितामार्फत स्थानीय तहको विकास, सुशासन तथा समृद्धिको प्रवर्द्धनमा पुर्याएको योगदानको कदर गर्दै सम्मान गरिएको हो।
वि.सं. २०७० सालदेखि पत्रकारिता क्षेत्रमा सक्रिय साउदले सुदूरपश्चिमको सञ्चार क्षेत्रको संस्थागत विकास, व्यावसायिक पत्रकारिता तथा अनलाइन सञ्चार माध्यमको सुदृढीकरणमा उल्लेखनीय भूमिका निर्वाह गर्दै आएका छन्। उनी हाल अनलाइन टिभी पत्रकार सङ्घ नेपाल सुदूरपश्चिम प्रदेशका महासचिवका रूपमा सक्रिय छन्।
सम्मान ग्रहणपछि साउदले प्राप्त सम्मानले आफूलाई पत्रकारिताप्रति अझ जिम्मेवार, प्रतिबद्ध र प्रेरित बनाएको प्रतिक्रिया दिए। उनले आगामी दिनमा पनि जनहित, पारदर्शिता, सुशासन र सकारात्मक परिवर्तनका पक्षमा निरन्तर कलम चलाउँदै पत्रकारितामार्फत समाज रूपान्तरणमा योगदान पुर्याउने प्रतिबद्धता व्यक्त गरे।
स्थानीय सरकार र सञ्चार क्षेत्रबीचको सहकार्यलाई थप प्रभावकारी बनाउन पत्रकारहरूको भूमिका महत्वपूर्ण रहेको उल्लेख गर्दै गाउँपालिकाले पत्रकारिता क्षेत्रमार्फत विकास र सुशासन प्रवर्द्धनमा योगदान पुर्याउने व्यक्तित्वहरूको सम्मानलाई निरन्तरता दिने जनाएको छ।
Discussion about this post