पूर्वप्रधानमन्त्री शेरबहादुर देउवा र उनकी पत्नी आरजु देउवा राणाले नेपाल फर्किने तयारी गरिरहेको जनाउँदै त्यसका लागि आवश्यक सहज वातावरण बनाउन सरकारसँग आग्रह गरेका छन्।
देउवा दम्पतीले आउँदो साउन २८ गतेभित्र नेपाल फर्किने जानकारी सम्बन्धित निकायलाई गराएका छन्। उनीहरूले सम्पत्ति शुद्धीकरण अनुसन्धान विभागलाई पत्राचार गर्दै स्वदेश फिर्तीका क्रममा कुनै असहज अवस्था सिर्जना नहोस् भन्ने अपेक्षासहित सहयोगको आग्रह गरेको स्रोतले जनाएको छ।
गत भदौ २४ गते नवयुवा आन्दोलनका क्रममा बूढानीलकण्ठस्थित निवासमा भएको प्रदर्शनका दौरान आक्रमणमा परेर घाइते भएपछि देउवा दम्पती थप उपचारका लागि सिंगापुर गएका थिए।
उपचारपछि उनीहरू नेपाल फर्किएर पुनः सिंगापुर गएको अनुमान गरिएको छ। यसबीच देउवा दम्पतीले सम्पत्ति शुद्धीकरण अनुसन्धान विभागलाई पठाएको इमेलमा आफूहरूमाथि धरपकड नगर्न सर्वोच्च अदालतले जेठ ११ गते अन्तरिम आदेश जारी गरिसकेको विषय पनि स्मरण गराएका छन्।
देउवा दम्पतीको स्वदेश फिर्तीको तयारी र सरकारसँग गरिएको आग्रहलाई राजनीतिक वृत्तमा चासोका साथ हेरिएको छ।
Discussion about this post