असार १ — गएको जेठ ३ गतेदेखि सुरु भएको मलमास अर्थात् अधिकमास आजदेखि समाप्त हुँदैछ। हरेक ३२ महिना १६ दिन १ घण्टा ३६ मिनेटमा पर्ने अधिकमासलाई पुरुषोत्तममास पनि भनिन्छ। यस अवधिमा विशेष पूजा, व्रत तथा धार्मिक अनुष्ठान गर्ने परम्परा रहिआएको छ।
मलमासको समापनको अवसरमा काठमाडौँको दक्षिण–पश्चिममा अवस्थित मत्स्यनारायण मन्दिर मा लागेको मेला आज सम्पन्न हुँदैछ। यस्तै, नृसिंहधाम मा एक महिनादेखि सञ्चालन भइरहेको धार्मिक मेला पनि जारी छ।
मलमासका कारण स्थगित भएका धार्मिक तथा सांस्कृतिक कार्यक्रम भोलिदेखि पुनः सुरु हुने भएका छन्। यसैक्रममा पर्सि रातो मच्छिन्द्रनाथ रथयात्रा अन्तर्गत लगनखेलको थतिटोलबाट रथ तानेर जावलाखेल पुर्याउने तयारी गरिएको छ।
आज सोमबार परेको औँसीका अवसरमा देशभरका वैदिक सनातन धर्मावलम्बीहरूले सोमबारे औँसी मनाइरहेका छन्। सोमबार औँसी परेका दिन बिहान नबोली स्नान गर्ने प्राचीन धार्मिक परम्परा रहिआएको छ। यस वर्ष अधिक ज्येष्ठ कृष्ण औँसी सोमबार परेकाले यसको धार्मिक महत्त्व अझ विशेष मानिएको छ।
Discussion about this post