सार्वजनिक लेखा समितिको बैठकमा अर्थमन्त्री डा. स्वर्णिम वाग्लेले सांसदहरूलाई धम्की दिएको आरोपपछि बैठकमा हंगामा भएको छ। बिहीबारको बैठकमा अर्थमन्त्रीले सुशासनका विषयमा ‘फाइल खोल्ने’ जस्ता अभिव्यक्ति दिएको विषय शुक्रबारको बैठकमा प्रवेश गरेपछि प्रतिपक्ष र सत्तापक्षका सांसदबीच चर्को बहस भएको हो।
पूर्वअर्थमन्त्री तथा नेकपा सांसद वर्षमान पुनले अर्थमन्त्री वाग्लेले समितिको मर्यादा विपरीत धम्कीपूर्ण शैलीमा अभिव्यक्ति दिएको आरोप लगाए। उनले सांसदहरूलाई हेप्ने र धम्की दिने ढंगमा प्रस्तुत भएको भन्दै कडा आपत्ति जनाए।
पुनले अर्थमन्त्रीले विगतका आर्थिक विधेयकहरूमा भएका कमजोरीको तुलना गर्दै दिएको अभिव्यक्तिलाई आपत्तिजनक भन्दै “अपराध जति भए पनि अपराध नै हो” भन्दै समितिले गम्भीर हुनुपर्ने बताए। उनले समितिको मर्यादा कायम राख्न नसकिए बैठकमै बस्ने–नबस्ने विषयमा सोच्नुपर्ने अवस्था आउन सक्ने चेतावनीसमेत दिए।
उनले सार्वजनिक लेखा समितिका सभापतिले यस विषयमा रुलिङ गर्नुपर्ने मागसमेत राखे।
सत्तापक्षका सांसद गणेश पराजुलीले भने पुनको आरोपलाई ‘चित्त दुखाइ र दुखेसो’ को संज्ञा दिँदै लोकतान्त्रिक प्रक्रियामा सबै पक्ष जिम्मेवार हुनुपर्ने प्रतिक्रिया दिए। उनले विगतमा प्रतिपक्षमा रहँदा पनि यस्ता अभिव्यक्तिहरू आउने गरेको स्मरण गर्दै त्यसलाई राजनीतिक अभ्यासको हिस्सा भएको टिप्पणी गरे।
दुवै पक्षबीचको तीव्र सवालजवाफपछि सार्वजनिक लेखा समितिका सभापति भरतबहादुर खड्काले अर्थमन्त्रीको अभिव्यक्तिबारे ध्यानाकर्षण भएको जनाउँदै विषयलाई पछि छलफल गर्ने बताए।
बैठकमा ‘कानूनी ग्रे एरिया’ स्पष्ट पार्नुपर्ने तथा अर्थमन्त्रीलाई जिम्मेवार हुनुपर्ने धारणा पनि उठाइएको थियो।
Discussion about this post