अर्थमन्त्री डा. स्वर्णिम वाग्लेले करका दर हेरफेर विवादमा कर्मचारीको त्रुटि रहेको बताउनुभएको छ ।
प्रतिनिधिसभाअन्तर्गतको सार्वजनिक लेखा समितिको आजको बैठकमा बोल्दै उहाँले जेठ १५ गते संसदमा पेश गरिएको आर्थिक विधेयकमा करका दर र शुल्कसम्बन्धी केही विषयमा हेरफेर भएको स्वीकार गर्नुभयो । तर उक्त त्रुटि अर्थमन्त्रीको नभई कर्मचारीस्तरबाट भएको उहाँको दाबी छ ।
अर्थमन्त्री वाग्लेले कर्मचारीहरूले बिहान ४ बजे विधेयक टाइप गर्ने क्रममा केही विषय छुटाएको बताउँदै आफू अर्थ मन्त्रालयको अभिभावक भएकाले नैतिक जिम्मेवारी भने आफूले लिएको स्पष्ट पार्नुभयो । उहाँले जेठ १७ गते नै त्रुटि सच्याउन संसद् सचिवालयमा निवेदन पठाइसकेको जानकारी पनि दिनुभयो ।
यता विपक्षी दलहरूले सांसदहरूले संशोधन प्रस्ताव दर्ता गर्ने अवसर नपाउँदै ५ बुँदे त्रुटि सच्याउने पत्र कुन कानुनी आधारमा पठाइएको हो भन्ने प्रश्न उठाएका छन् । तर अर्थमन्त्रीले उक्त प्रश्नको स्पष्ट जवाफ दिनुभएन ।
बैठकमा उहाँले करका दर हेरफेरको विषयलाई लिएर प्रधानमन्त्री र आफूलाई बदनाम गर्ने प्रयास भइरहेको आरोप लगाउँदै यो विवादलाई राष्ट्रिय स्वतन्त्र पार्टी को जनादेश स्वीकार गर्न नसकेका पक्षहरूको राजनीतिक अभियानको रूपमा समेत चित्रण गर्नुभयो ।
Discussion about this post