प्रतिनिधिसभाको आजको बैठक पनि स्थगित भएको छ। सीमा विवादसम्बन्धी प्रधानमन्त्री बालेन्द्र शाहको अभिव्यक्तिमा माफी माग्नुपर्ने विपक्षी दलहरूको अडान कायमै रहेपछि बैठक भोलि बिहान ११ बजे बस्ने गरी स्थगित गरिएको हो।
बैठक कार्यसूचीमा प्रवेश नै नगरी स्थगित भएको थियो। बैठकको सुरुमै प्रमुख प्रतिपक्षी दल नेपाली कांग्रेसका सचेतक निश्कल राईले शहीदहरूको सम्झनामा ५ मिनेट मौनधारण गर्न आग्रह गर्नुभएको थियो।
सामान्यतया शहीदहरूको सम्मानमा १ मिनेट मौनधारण गर्ने प्रचलन रहे पनि आज प्रतिपक्षी दलको अगुवाइमा ५ मिनेट मौनधारण गरिएको थियो। यसप्रति सभामुख डोलप्रसाद अर्यालले आपत्ति जनाउँदै प्रतिपक्षी बेन्चले सभाको अपमान गरेको टिप्पणी गर्नुभएको छ। उहाँले यस विषयमा आफ्नो ध्यानाकर्षण भएको पनि बताउनुभयो।
गत जेठ १७ गते प्रतिनिधिसभामा प्रधानमन्त्री बालेन्द्र शाहले नेपालले समेत भारतको जमिन मिचेको भन्ने अभिव्यक्ति दिएपछि विपक्षी दलहरूले त्यसको विरोध गर्दै आएका छन्।
यसैबीच, श्रम संस्कृति पार्टीका अध्यक्ष तथा सांसद हर्क साम्पाङले प्रधानमन्त्रीको उक्त अभिव्यक्तिप्रति आपत्ति जनाउँदै प्रतिनिधिसभामा सङ्कल्प प्रस्ताव दर्ता गर्नुभएको छ।
बैठकमा सांसद निश्कल राईले प्रधानमन्त्रीको अभिव्यक्ति राष्ट्रहितविपरीत र तथ्यहीन रहेको दाबी गर्दै त्यसलाई संसद्को अभिलेखबाट हटाउन समेत माग गर्नुभएको छ।
Discussion about this post