सरकारले पूर्वगृहमन्त्री सुधन गुरुङमाथि छानबिन गर्न गठित समितिको प्रतिवेदन स्वीकार गर्ने निर्णय गरेको छ।
सिंहदरबारमा आज बसेको मन्त्रिपरिषद् बैठकले पूर्वन्यायाधीश अच्युतप्रसाद भण्डारीको संयोजकत्वमा गठित समितिले पेश गरेको प्रतिवेदन स्वीकार गर्ने निर्णय गरेको सरकारका प्रवक्ता तथा शिक्षा तथा खेलकुदमन्त्री सस्मित पोखरेलले जानकारी दिए।
गत वैशाख २८ गतेको मन्त्रिपरिषद् बैठकले उच्च अदालतका पूर्वन्यायाधीश भण्डारीको नेतृत्वमा छानबिन समिति गठन गरेको थियो। समितिमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि नेउपाने सदस्य रहेका थिए।
समितिले आफ्नो प्रतिवेदनमार्फत गुरुङलाई ‘क्लिनचिट’ दिएको छ। प्रधानमन्त्रीको सचिवालयका अनुसार गुरुङलाई आजै गृहमन्त्री पदको शपथ गराउने तयारी गरिएको छ।
त्यस्तै, मन्त्रिपरिषद्ले दोलखाका विशालकुमार भण्डारीको अध्यक्षतामा नेपाल रेडक्रस सोसाइटीको नौ सदस्यीय तदर्थ समिति गठन गर्ने निर्णय गरेको छ। साथै निजामती सेवा (१६औँ संशोधन) नियमावली–२०८३ स्वीकृत गर्ने निर्णय पनि गरिएको छ।
बैठकले तल्लो अरुण, लोवर न्यादी खोला, हुन्सा खोला तथा तादी खोला जलविद्युत् आयोजनालाई राष्ट्रिय वन क्षेत्र प्रयोग गर्न स्वीकृति दिने निर्णयसमेत गरेको छ।
Discussion about this post