काठमाडौं – राष्ट्रिय स्वतन्त्र पार्टी (रास्वपा)ले आजदेखि देशभर जिल्ला अधिवेशन सुरु गर्ने भएको छ। पार्टीले प्रथम राष्ट्रिय महाधिवेशनको तयारीलाई तीव्र बनाउँदै जिल्ला तहको नेतृत्व चयन प्रक्रिया अघि बढाएको हो। रास्वपाले हालसम्म ७७ वटै जिल्लामा तदर्थ समिति गठन गरिसकेको छ। पछिल्लोपटक डोल्पा जिल्लामा तदर्थ समिति गठन भएसँगै देशभर संगठन विस्तारको प्रारम्भिक चरण पूरा भएको पार्टीले जनाएको छ।
यद्यपि गण्डकी प्रदेशका हिमाली जिल्ला मनाङ र मुस्ताङमा भने यसपटक जिल्ला अधिवेशन नहुने भएको छ। ती जिल्लामा वडा तथा पालिका अधिवेशनसमेत सम्पन्न नभएकाले जिल्ला अधिवेशन स्थगित गरिएको बताइएको छ। पार्टीको विधानअनुसार कुनै पनि जिल्लामा कम्तीमा ३० प्रतिशत पालिकाको अधिवेशन सम्पन्न भएपछि जिल्ला अधिवेशन गर्न सकिने व्यवस्था छ। सोही आधारमा अधिकांश जिल्लामा अधिवेशन प्रक्रिया अगाडि बढाइएको हो।
आज र भोलि जिल्ला अधिवेशन सम्पन्न गरेपछि रास्वपाले जेठ २६ गतेदेखि असार १ गतेसम्म प्रदेश अधिवेशन सञ्चालन गर्ने कार्यतालिका सार्वजनिक गरेको छ। पार्टीको पहिलो राष्ट्रिय महाधिवेशन भने असार ७, ८ र ९ गते चितवनमा आयोजना हुने तय भएको छ। महाधिवेशनमार्फत नयाँ नेतृत्व चयन गर्नुका साथै संगठनात्मक संरचनालाई थप मजबुत बनाउने र भावी राजनीतिक कार्यदिशा तय गर्ने तयारी रास्वपाले गरेको छ। स्थापना भएको छोटो अवधिमै राष्ट्रिय राजनीतिक शक्तिका रूपमा उदाएको रास्वपाले वडा, पालिका, जिल्ला र प्रदेश हुँदै महाधिवेशनसम्मको संगठनात्मक प्रक्रिया पूरा गर्न लागेको हो। पार्टी नेतृत्वले महाधिवेशनलाई लोकतान्त्रिक, सहभागितामूलक र प्रतिनिधिमूलक बनाउने लक्ष्य लिएको जनाएको छ।
Discussion about this post