भूमि व्यवस्था, सहकारी तथा गरिबी निवारण मन्त्रालयअन्तर्गत नापी विभागले ‘मेरोकित्ता’ मोबाइल एप सार्वजनिक गरेको छ । हिजो आयोजित कार्यक्रममा मन्त्री प्रतिभा रावलले एप सार्वजनिक गर्दै यसमार्फत नागरिकले जग्गासम्बन्धी विभिन्न सेवा घरमै बसेर प्राप्त गर्न सक्ने बताउनुभएको छ ।
नापी विभागका अनुसार ‘मेरोकित्ता’ एप एन्ड्रोइड र आइओएस दुवै प्लेटफर्ममा उपलब्ध छ । सेवाग्राहीले यसलाई प्ले स्टोर र एप स्टोरबाट डाउनलोड गर्न सक्नेछन् ।
एपमार्फत नक्सा प्रिन्ट, फिल्डबुक उतार, प्लट रजिस्टर उतार तथा फिल्ड रेखाङ्कनसम्बन्धी सेवाका लागि अनलाइन आवेदन दिन सकिने व्यवस्था गरिएको छ । आवेदन दर्तापछि प्रणालीबाट ओटीपी उपलब्ध हुने र सेवाग्राहीले मोबाइल नम्बर तथा ओटीपीको प्रयोग गरी आफ्नो आवेदनको अवस्था नियमित रूपमा अनुगमन गर्न सक्नेछन् ।
विभागका अनुसार फिल्ड रेखाङ्कन सेवाका लागि आवश्यक राजस्वसमेत अनलाइनमार्फत भुक्तानी गर्न सकिनेछ । साथै, एपबाट सम्बन्धित नापी कार्यालयका कार्यालय प्रमुख तथा सूचना अधिकारीको सम्पर्क नम्बरसमेत प्राप्त गर्न सकिने व्यवस्था गरिएको छ ।
नापी विभागले ‘मेरोकित्ता’ सेवा मोबाइल एपसँगै वेब संस्करणमा पनि उपलब्ध रहेको जनाएको छ । एप सञ्चालनमा आएपछि जग्गासम्बन्धी सेवा प्रवाहलाई थप सहज, छिटो र पारदर्शी बनाउन सहयोग पुग्ने अपेक्षा गरिएको छ ।
Discussion about this post