काठमाडौं । विपक्षी दलहरूको निरन्तर विरोध र नाराबाजीका कारण प्रतिनिधिसभा बैठक स्थगित भएको छ। सभामुख डोलप्रसाद अर्यालले सदनको अवरोध नहटेपछि अर्को बैठक जेठ २५ गते बस्ने गरी स्थगित भएको घोषणा गरेका हुन्।
दिउँसो १ बजेका लागि तय गरिएको बैठक करिब दुई घण्टा ढिलो गरी अपराह्न ३ बजे सुरु भएको थियो। बैठक प्रारम्भ भएपछि विपक्षी दलका सांसदहरूले उठेर विरोध जनाएका थिए।
सभामुख अर्यालले विपक्षी दलका केही सांसदहरूलाई आफ्नो धारणा राख्न समय दिएका थिए। सांसदहरूले आफ्नो असन्तुष्टि व्यक्त गरे पनि सदनको अवरोध भने कायम राखेका थिए।
विपक्षी दलहरूले प्रधानमन्त्री बालेन्द्र शाह ९बालेन० ले सीमा विवादका विषयमा दिएको अभिव्यक्तिको तथ्यगत आधार सार्वजनिक गर्न माग गर्दै आएका छन्। यदि उक्त अभिव्यक्ति तथ्यहीन रहेको प्रमाणित भए प्रधानमन्त्रीले संसद् र जनतासमक्ष माफी माग्नुपर्ने उनीहरूको अडान छ।
बुधबारको बैठकमा पनि विपक्षी दलहरूले सोही माग दोहोर्याएका थिए। सभामुखले कार्यसूची अघि बढाउने प्रयास गरे पनि विपक्षी सांसदहरू आफ्नो अडानबाट पछि नहटेपछि बैठक स्थगित गर्नुपरेको हो।
आजको बैठकमा राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको व्यहोरा पढेर सुनाउने लगायतका कार्यसूची समावेश थिए। तर सदनमा जारी अवरोधका कारण ती कार्यसूचीमाथि छलफल हुन सकेन।
संसद्को गतिरोध कायमै रहेकाले आगामी बैठकमा सहमति जुटाउने प्रयास हुने अपेक्षा गरिएको छ।
Discussion about this post