कञ्चनपुर । कञ्चनपुरको वेदकोट नगरपालिका–९ सुन्दरपुरमा बृहत् सरसफाई तथा खानेपानी सम्बन्धी जनचेतनामूलक कार्यक्रम सफलतापूर्वक सम्पन्न भएको छ। बैजनाथ सुडा खानेपानी उपभोक्ता तथा सरसफाई समितिको आयोजनामा शनिबार समुदायमा स्वच्छता, सुरक्षित खानेपानीको प्रयोग तथा वातावरण संरक्षण सम्बन्धी जनचेतना अभिवृद्धि गर्ने उद्देश्यले उक्त कार्यक्रम गरिएको हो।
कार्यक्रम अन्तर्गत सुन्दरपुर स्थानीय क्षेत्रको सरसफाई गरिनुका साथै सुरक्षित खानेपानीको प्रयोग, पानीका स्रोतहरूको संरक्षण, उचित फोहोर व्यवस्थापन र व्यक्तिगत एवम् वातावरणीय सरसफाईका विषयमा स्थानीय बासिन्दा तथा व्यापारीहरूलाई सचेत गराइएको थियो। अभियानमा स्थानीय जनप्रतिनिधि, समाजसेवी, उपभोक्ता समितिका पदाधिकारी, विद्यार्थी तथा स्थानीय उपभोक्ताहरूको सक्रिय सहभागिता रहेको थियो।
बैजनाथ सुडा खानेपानी उपभोक्ता तथा सरसफाई समितिका अध्यक्ष पदमसिंह कुँवरले स्वच्छ वातावरण र सुरक्षित खानेपानी स्वस्थ जीवनका मुख्य आधार भएको बताउनुभयो। “सरसफाईको सुरुवात आफैँबाट हुनुपर्छ,” अध्यक्ष कुँवरले भन्नुभयो, “अहिले पनि समुदायमा जनचेतनाको केही कमी देखिएकाले हामी ११ जनाको समिति बनाएर यसरी नै निरन्तर जनचेतना फैलाउँदै जानेछौँ। समुदायस्तरबाटै खानेपानी संरक्षण र सरसफाईमा सबैको अपनत्व आवश्यक छ।”
यस्तै वेदकोट नगरपालिका वडा नम्बर ९ का कार्यवाहक अध्यक्ष पार्वतीदेवी विष्टले वडा कार्यालय, बैजनाथ सुडा खानेपानी समिति र स्थानीयबासीको आपसी सहकार्यमा यो बृहत् कार्यक्रम सम्भव भएको उल्लेख गर्नुभयो। उहाँले सरसफाई राख्नु सबैको साझा जिम्मेवारी भएकाले यस अभियानमा सधैँ हातेमालो गरेर सहयोग गरिदिन सम्पूर्ण नगरबासीलाई आग्रह गर्नुभयो।
इन्द्रेणी कृषि सहकारी संस्था लिमिटेडका अध्यक्ष सिद्धराज भट्टले आफ्नो गाउँ र वरपरको वातावरण स्वच्छ राख्नु प्रत्येक नागरिकको दायित्व भएको बताउनुभयो। सो अवसरमा सहकारी संस्थाका तर्फबाट सरसफाई कार्यका लागि ट्र्याक्टर सहयोग उपलब्ध गराइएको जानकारी समेत उहाँले दिनुभयो।
समितिले आगामी दिनहरूमा पनि यस्ता जनचेतनामूलक र व्यवहारिक कार्यक्रमहरूलाई निरन्तरता दिँदै सुन्दरपुर क्षेत्रलाई स्वच्छ र स्वस्थ बनाउने प्रतिबद्धता व्यक्त गरेको छ।
Discussion about this post