काठमाडौँ । नेकपा एमाले का महासचिव शंकर पोखरेलले पार्टी निर्वाचनपछि समीक्षा चरणमा प्रवेश गरेको बताएका छन्।बुधबार सामाजिक सञ्जाल फेसबुकमार्फत उनले वडा, पालिका र जिल्ला तहमा निर्वाचन समीक्षा सञ्चालन भइरहेको जानकारी दिएका हुन्। प्रदेश तहबाट समीक्षा प्रतिवेदन प्राप्त भएपछि केन्द्रीय सचिवालयले समग्र प्रतिवेदन तयार गर्ने उनले उल्लेख गरेका छन्।
उनका अनुसार केन्द्रीय सचिवालयले अनलाइन प्रश्नावलीमार्फत अगुवा कार्यकर्ताबाट व्यक्तिगत सुझावसमेत सङ्कलन गरिरहेको छ। ती सबै तथ्य र सुझावका आधारमा पार्टी अध्यक्ष केपी शर्मा ओलीको उपस्थितिमा केन्द्रीय कमिटीले समग्र समीक्षा गर्दै संस्थागत दृष्टिकोण तय गर्ने तयारी गरिएको छ।
महासचिव पोखरेलले समीक्षा प्रक्रियाबाट पार्टीलाई योजनाबद्ध रूपमा पुनर्जागृत र पुनर्गठित गरिने बताएका छन्। साथै, यस अवधिमा पार्टीलाई कमजोर पार्ने उद्देश्यले हुने प्रचारबाजीबाट प्रभावित नहुन सम्पूर्ण कार्यकर्तालाई आग्रह गरेका छन्।
गत फागुनमा सम्पन्न प्रतिनिधिसभा निर्वाचनमा एमाले २५ सिटमा सीमित भएको थियो।
Discussion about this post