काठमाडौं — प्रधानमन्त्री बालेन्द्र शाह (बालेन) ले नेपाल संवत्, म्ह पूजा तथा गोवर्धन पूजाको अवसरमा शुभकामना व्यक्त गर्दै चाडपर्वले समाजमा आपसी सद्भाव, सहिष्णुता र सामाजिक एकताको भावना बलियो बनाउन प्रेरित गर्ने विश्वास व्यक्त गरेका छन्।
नेपाल संवत् ११४७ तथा म्ह पूजाको अवसरमा शुभकामना सन्देश जारी गर्दै प्रधानमन्त्री शाहले नेपाल संवत् राष्ट्रिय विभूति शङ्खधर साख्वाःले सर्वसाधारणलाई ऋणमुक्त गराएर सुरु गरेको मौलिक समयचक्र र नेपाली पहिचान भएको उल्लेख गरेका छन्।
उनले नेवार समुदायले विशेष हर्षोल्लासका साथ मनाउने म्ह पूजाले आत्मशुद्धि, आत्मसम्मान र चेतनाको बोध गराउने बताएका छन्। आफ्नै शरीर र चेतनालाई पूजा गर्ने यस मौलिक परम्पराले समुदायभित्र आपसी सद्भाव, आत्मबल र पुर्ख्यौली संस्कृतिको संरक्षणमा महत्वपूर्ण योगदान पुर्याउँदै आएको उनको भनाइ छ।
त्यस्तै, गोवर्धन पूजाको धार्मिक तथा सांस्कृतिक महत्व उल्लेख गर्दै प्रधानमन्त्री शाहले यस दिन भगवान् श्रीकृष्णले गोवर्धन पर्वत उठाएर द्वारिकावासीको रक्षा गरेको पौराणिक मान्यतासँगै कृषिकर्ममा महत्वपूर्ण भूमिका निर्वाह गर्ने गोरु तथा कृषि औजारको पूजा गर्ने परम्परा रहेको बताएका छन्।
उनले भैलोका मीठा भाका र देउसेहरूको उल्लासमय आशीर्वादले छरछिमेकमा आत्मीयता र सद्भाव बढाउने विश्वास पनि व्यक्त गरेका छन्।
प्रधानमन्त्री शाहले मौलिक चाडपर्वले आपसी रिसराग बिर्सेर सामाजिक एकता र सहिष्णुतालाई अझ बलियो बनाउन प्रेरणा दिऊन् भन्दै देश तथा विदेशमा रहेका सम्पूर्ण नेपालीको जीवनमा सुख, शान्ति, समृद्धि र उत्तरोत्तर प्रगतिको कामना गरेका छन्।
Discussion about this post