काठमाडौँ – नेपाली कांग्रेस ले वैशाख महिनाभर देशभर क्रियाशील सदस्यता नवीकरण तथा वितरण अभियान सञ्चालन गर्ने भएको छ । पार्टीका अनुसार अब क्रियाशील सदस्यता लिन चाहने व्यक्तिले अनिवार्य रूपमा सम्बन्धित वडा कार्यसमितिमा आफै उपस्थित भई फारम भर्नुपर्ने व्यवस्था गरिएको छ । अरूले फारम भर्ने वा शुल्क तिर्ने पुरानो अभ्यास अन्त्य गरिएको छ ।
महामन्त्री प्रदीप पौडेल का अनुसार सदस्य बन्न चाहनेले वडा कार्यालयमै फोटो खिचाउनुपर्ने, मोबाइल नम्बर उपलब्ध गराउनुपर्ने र ओटिपीमार्फत प्रमाणिकरण गरिनेछ । अब परम्परागत कार्डको सट्टा डिजिटल ‘कांग्रेस आइडी’ प्रदान गरिनेछ । सभापति गगन थापा ले वैशाखभित्र अद्यावधिक नगर्ने सदस्यहरू महाधिवेशन प्रक्रियाबाट बाहिरिने स्पष्ट पार्दै सक्रिय र प्रतिबद्ध सदस्य मात्रै कायम राख्ने उद्देश्य रहेको बताए ।
देशभरका ६ हजार ७ सय ४३ वडामा सञ्चालन हुने अभियानमार्फत सदस्यता व्यवस्थापनलाई थप व्यवस्थित र पारदर्शी बनाउने पार्टीको लक्ष्य छ । साथै, नयाँ सदस्यले ‘पार्टीको सिद्धान्त र आदर्शप्रति प्रतिबद्ध रहने’ शपथसमेत लिनुपर्ने व्यवस्था गरिएको छ ।
Discussion about this post