कञ्चनपुर । सुदूरपश्चिमको पर्यटकीय हब महेन्द्रनगरमा ‘प्रविधि-प्रेरित आतिथ्य सत्कार ‘एआई’ सम्बन्धी चार दिने विशेष तालिम सफलतापूर्वक सम्पन्न भएको छ।
होटल संघ नेपालको सहयोगमा आयोजित उक्त तालिम शुक्रबार होटल गंगोत्री गोल्डको सभाहलमा एक समारोहका बीच समापन गरिएको हो। तालिममा विशेष गरी होटल व्यवसायलाई आधुनिक र प्रतिस्पर्धी बनाउन आर्टिफिसियल इन्टेलिजेन्स (एआई) र डिजिटल माध्यमको प्रयोग कसरी गर्ने भन्ने विषयमा केन्द्रित रहेर प्रशिक्षण दिइएको थियो।
कार्यक्रमका मुख्य प्रशिक्षक शैलेन्द्र राज जोशीले बदलिँदो समयसँगै होटल व्यवसायलाई चुस्त-दुरुस्त राख्न डिजिटल प्लेटफर्मको प्रयोग अनिवार्य रहेको बताउनुभयो। उहाँले व्यवसायको प्रवर्द्धन र सेवा व्यवस्थापनमा एआईसँगको समन्वयले लागत घटाउने र कार्यक्षमता बढाउनेमा जोड दिनुभयो।
कार्यक्रम संयोजक जगदीश भट्टका अनुसार तालिममा कञ्चनपुरसहित कैलाली र डडेल्धुराका होटल व्यवसायी, सरोकारवाला र पर्यटन क्षेत्रमा भविष्य खोजिरहेका युवाहरूको उपस्थिति रहेको थियो। विशेष गरी सुदूरपश्चिम विश्वविद्यालयका होटल म्यानेजमेन्टमा अध्ययनरत विद्यार्थीहरूले यस प्रविधि-प्रेरित तालिममा विशेष चासोका साथ सहभागिता जनाएका थिए।
सहभागीहरूले चार दिनको अवधिमा डिजिटल मार्केटिङको प्रभावकारी उपयोग, एआईका टुल्सहरू प्रयोग गरेर व्यवसायको प्रचारप्रसार गर्ने तरिका र ग्राहक सेवामा प्रविधिको भूमिकाबारे व्यवहारिक ज्ञान प्राप्त गरेको बताएका छन्। तालिमको समापनमा सहभागीहरूलाई प्रमाणपत्र समेत वितरण गरिएको थियो।
होटल व्यवसायी संघ कञ्चनपुरका अध्यक्ष रामचन्द्र रेग्मीले अहिलेको प्रतिस्पर्धी बजारमा टिक्नका लागि प्रविधिमैत्री हुनुको विकल्प नरहेको बताउनुभयो। उहाँले परम्परागत होटल व्यवसायलाई आधुनिकीकरण गर्न एआई (एआई) र डिजिटल मार्केटिङले मेरुदण्डको काम गर्ने उल्लेख गर्दै यस्ता तालिमले दक्ष जनशक्ति उत्पादनमा सहयोग पुग्ने बताउनुभयो।
Discussion about this post