काठमाडौँ — ओमानका लागि प्रस्तावित नेपाली राजदूत पदमाक्षी राणाले नेपाल र ओमानबीचको श्रम सहकार्य, व्यापार तथा लगानीलाई थप विस्तार गर्ने प्रतिबद्धता जनाउनुभएको छ।
मंगलबार संसदीय सुनुवाइ समितिमा आफ्नो कार्ययोजना प्रस्तुत गर्दै उहाँले नेपालको राष्ट्रिय हितको संरक्षण गर्दै दुई देशबीचको दीर्घकालीन मैत्रीपूर्ण सम्बन्धलाई थप सुदृढ बनाउने बताउनुभयो।
राणाले नेपाल र ओमानबीचको जनस्तरको सम्बन्ध विस्तार गर्दै साझा समृद्धिका लागि व्यावहारिक सहकार्यमा जोड दिनुभयो। उहाँले निरन्तर सहकार्य हुँदै आएको श्रम क्षेत्रमा सहयोगलाई थप प्रभावकारी बनाउने प्रतिबद्धतासमेत व्यक्त गर्नुभयो।
त्यस्तै, ओमानसँग व्यापार तथा लगानी प्रवर्द्धनका लागि सम्भावित साझेदार पहिचान गर्ने, बजारको अवस्था बुझ्ने र व्यावसायिक सहकार्य विस्तार गर्न सहजीकरण गर्ने उहाँले बताउनुभयो।
स्पष्ट लक्ष्य, संस्थागत जिम्मेवारी र मापनयोग्य उपलब्धिलाई प्राथमिकता दिँदै काम गर्ने राणाको भनाइ छ।
Discussion about this post