काठमाडौं । स्वास्थ्य बीमा बोर्ड ले अब राष्ट्रिय परिचयपत्रका आधारमा बिमितलाई सेवा प्रवाह गर्ने भएको छ। बोर्डका अनुसार बीमा नवीकरण गर्दा तथा नयाँ आबद्धता गर्दा अनिवार्य रूपमा राष्ट्रिय परिचयपत्र तथा पञ्जीकरण विभाग बाट जारी गरिएको राष्ट्रिय परिचयपत्र बुझाउनुपर्ने व्यवस्था लागू गरिनेछ।
कतिपय बिमितले दोहोरो सुविधा लिने तथा फरक–फरक स्थानबाट सेवा लिने समस्या देखिएपछि यसलाई नियन्त्रण गर्न यस्तो व्यवस्था लागू गर्न लागिएको बोर्डले जनाएको छ। यससम्बन्धी समझदारीपत्रमा बोर्डका कार्यकारी निर्देशक डा. कृष्णप्रसाद पौडेल र विभागका महानिर्देशक नमराज घिमिरे बीच हस्ताक्षर भएको छ। बोर्डका सूचना अधिकारी विकेश मल्ल का अनुसार राष्ट्रिय परिचयपत्र नम्बरमार्फत नागरिकको पहिचान डिजिटल रूपमा प्रमाणीकरण गरिनेछ। अब बीमामा आबद्ध हुन आउनेलाई राष्ट्रिय परिचयपत्र अनिवार्य रूपमा ल्याउन भनिनेछ भने नभएकाहरूलाई निश्चित समयभित्र बनाउन अनुरोध गरिनेछ।
यो व्यवस्था यही चैत २५ गतेदेखि लागू हुने छ, जसअन्तर्गत दर्ता तथा नवीकरण प्रक्रिया राष्ट्रिय परिचयपत्रकै आधारमा सञ्चालन गरिनेछ। हाल स्वास्थ्य बीमा कार्यक्रममा करिब एक करोड दुई लाख बिमित आबद्ध छन् भने हालसम्म नागरिकता र चालक अनुमतिपत्रका आधारमा बीमा सेवा उपलब्ध हुँदै आएको छ। सूचना अधिकारी मल्लले राष्ट्रिय परिचयपत्रको प्रयोगले बीमा दर्ता, नवीकरण तथा सेवा प्राप्ति प्रक्रियालाई थप सरल बनाउने, तथ्याङ्क एकीकरण गर्ने, दोहोरो दर्ता नियन्त्रण गर्ने तथा सेवा प्रवाहलाई प्रभावकारी बनाउने विश्वास व्यक्त गर्नुभएको छ।
Discussion about this post