काठमाण्डौ — अमेरिकी पत्रिका टाइम म्यागजिनले सन् २०२६ का लागि सार्वजनिक गरेको जलवायु परिवर्तनसम्बन्धी विश्वका १०० प्रभावशाली व्यक्तित्वको सूचीमा नेपालका अर्थमन्त्री डा. स्वर्णिम वाग्ले समेटिनुभएको छ।
भोटेकोशी बाढीपछि जलवायु न्यायका विषयमा अन्तर्राष्ट्रिय मञ्चहरूमा गर्नुभएको पैरवी, जलवायु वित्त परिचालनका लागि अघि सार्नुभएको पहल तथा स्रोत व्यवस्थापन र अन्तर्राष्ट्रिय प्रणालीगत सुधारसम्बन्धी विचारलाई महत्त्व दिँदै टाइम म्यागजिनले उहाँलाई उक्त सूचीमा समावेश गरेको हो।
दिगो आर्थिक विकासको क्षेत्रमा विगत २८ वर्षदेखि अध्ययन, अनुसन्धान तथा नीति निर्माणमा सक्रिय रहनुभएका अर्थमन्त्री वाग्ले अर्थशास्त्री, नीति निर्माता र राजनीतिज्ञका रूपमा परिचित हुनुहुन्छ।
भोटेकोशी बाढीपछि उहाँले जलवायु न्याय, अन्तर्राष्ट्रिय सहयोग र जलवायु वित्तका विषयमा उठाउनुभएका मुद्दालाई सूचीमा छनोटको महत्वपूर्ण आधार मानिएको छ।
टाइम म्यागजिनले सार्वजनिक गरेको उक्त सूचीमा संयुक्त राष्ट्रसङ्घका महासचिव एन्टोनियो गुटेरेस, बेलायती राजकुमार विलियम र युरोपेली आयोगकी अध्यक्ष उर्सुला भोन डर लेयेनलगायत विश्वका विभिन्न क्षेत्रका प्रभावशाली व्यक्तित्वहरू पनि समावेश छन्।
अन्तर्राष्ट्रियस्तरको प्रतिष्ठित सूचीमा नेपाली अर्थमन्त्रीको नाम समावेश हुनुलाई नेपालको जलवायु परिवर्तनसम्बन्धी मुद्दा र जलवायु न्यायका सवालले विश्वव्यापी ध्यान पाएको घटनाका रूपमा हेरिएको छ।
Discussion about this post