बैतडी – बैतडीको शिवनाथ गाउँपालिकामा गाउँपालिकास्तरीय छैटौँ राष्ट्रपति रनिङ शिल्ड प्रतियोगिता मङ्गलबारदेखि सुरु भएको छ। सुल्लेखानस्थित खेलमैदानमा गाउँपालिका अध्यक्ष कर्णसिंह साउँदको अध्यक्षतामा आयोजित कार्यक्रमका बीच प्रतियोगिताको औपचारिक उद्घाटन गरिएको हो।
दुई दिनसम्म सञ्चालन हुने प्रतियोगितामा गाउँपालिकाभरिका ९ वटा माध्यमिक विद्यालयका विद्यार्थी खेलाडीहरूको सहभागिता रहेको छ। प्रतियोगितामा विभिन्न खेल विधामा प्रतिस्पर्धा हुनेछ।
प्रतियोगितामा उत्कृष्ट प्रदर्शन गर्ने खेलाडीहरूबाट छनोट गरी जिल्लास्तरीय राष्ट्रपति रनिङ शिल्ड प्रतियोगिताका लागि शिवनाथ गाउँपालिकाको टिम तयार गरिने गाउँपालिका अध्यक्ष साउँदले जानकारी दिनुभयो। अध्यक्ष साउँदले खेलकुद क्षेत्रको विकासका लागि गाउँपालिका निरन्तर प्रतिबद्ध रहेको बताउनुभयो। उहाँले गाउँपालिकाको केन्द्र सुल्लेखानमा व्यवस्थित खेलमैदान निर्माण कार्य जारी रहेको उल्लेख गर्दै आगामी दिनमा समेत खेलकुदलाई प्राथमिकतामा राखेर कार्यक्रम सञ्चालन गरिने प्रतिबद्धता व्यक्त गर्नुभयो।
उद्घाटन समारोहमा पाटन नगरपालिकाका नगर प्रमुख गौरीसिंह रावल प्रमुख अतिथिका रहनुभएको थियो। कार्यक्रममा स्थानीय जनप्रतिनिधि, शिक्षक, विद्यार्थी तथा खेलप्रेमीहरूको उल्लेखनीय उपस्थिति रहेको थियो।
विद्यार्थीहरूको सक्रिय सहभागितालाई ध्यानमा राख्दै शिवनाथ गाउँपालिकाले प्रतियोगिता अवधिभर मङ्गलबार र बुधबार दुई दिन विद्यालयहरूमा सार्वजनिक बिदा समेत दिएको छ।
Discussion about this post