कञ्चनपुर । सडक दुर्घटना न्यूनीकरण र जनचेतना फैलाउने उद्देश्यका साथ कञ्चनपुरको भीमदत्त नगरपालिका वडा नम्बर-१०, सुकसालमा शनिबार एक महत्वपूर्ण कार्यक्रम सम्पन्न भएको छ । शिक्षा युथ क्लबले आयोजना गरेको ‘रिफ्लेक्टर बेल्ट वितरण तथा सचेतना कार्यक्रम’ अन्तर्गत सडकमा रहेका गाईहरूलाई रिफ्लेक्टर बेल्ट लगाइएको छ ।
कार्यक्रमको मुख्य उद्देश्य रातिको समयमा हुने सडक दुर्घटना घटाउनु रहेको थियो। रिफ्लेक्टर बेल्ट लगाइएका गाईहरूलाई सवारी चालकहरूले टाढैबाट सजिलै देख्न सक्नेछन्, जसले गर्दा सम्भावित दुर्घटनाबाट जोगिन मद्दत पुग्ने विश्वास गरिएको छ।
कार्यक्रममा क्लबका पदाधिकारी, सदस्यहरूका साथै जनप्रतिनिधि, नेपाल प्रहरी, ट्राफिक प्रहरी र स्थानीय बासिन्दाहरूको सक्रिय सहभागिता रहेको थियो। त्यस्तै सहभागीहरूलाई सडक सुरक्षाबारे विस्तृत जानकारी दिइएको थियो । क्लबले पशुपालकहरूलाई आफ्ना गाईवस्तुहरूमा रिफ्लेक्टर बेल्टको सही प्रयोग गर्नका लागि प्रेरित समेत गरेको थियो ।
शिक्षा युथ क्लबले यो कार्यक्रमले सडक दुर्घटनाको संख्या घटाउनुका साथै समुदायमा जनचेतना बढाउन महत्वपूर्ण योगदान पुर्याउने अपेक्षा व्यक्त गरेको छ । क्लबले कार्यक्रम सफल बनाउन सहयोग गर्ने सम्पूर्ण सहभागीहरू, सुरक्षाकर्मीहरू तथा स्थानीयहरूलाई हार्दिक आभार पनि व्यक्त गरेको छ ।
Discussion about this post