काठमाडौं। नेपाली कांग्रेसले यस वर्ष कोजाग्रत पूर्णिमाका अवसरमा आयोजना गर्दै आएको चियापान कार्यक्रम नगर्ने भएको छ। देश शोकमा रहेकाले यस वर्ष कार्यक्रम स्थगित गरिएको पार्टीका कार्यवाहक मुख्य सचिव कृष्णप्रसाद दुलालले जानकारी दिएका छन्।
दुलालका अनुसार सभापति गगन थापाले शोकको यस घडीमा चाडपर्व मनाउँदा भड्किलो गतिविधि नगरी शान्त र संयमित रूपमा परिवारमा सीमित रहेर मनाउन आग्रह गरेका छन्।
नेपाली कांग्रेसले विगतदेखि नै कोजाग्रत पूर्णिमाका दिन चियापान समारोह आयोजना गर्दै आएको थियो। पार्टीका संस्थापक नेता बीपी कोइरालाले २०३३ साल पुस १६ गते राष्ट्रिय एकता तथा मेलमिलापको नीति लिएर स्वदेश फर्किएपछि २०३४ सालको कोजाग्रत पूर्णिमामा शुभकामना आदानप्रदान र आपसी सद्भाव अभिवृद्धि गर्ने उद्देश्यले चियापान कार्यक्रम सुरु गरेका थिए।
त्यसयता केही वर्ष विशेष कारणले कार्यक्रम आयोजना हुन नसके पनि कांग्रेसले हरेक वर्ष उक्त परम्परालाई निरन्तरता दिँदै आएको थियो।
पार्टीले जारी गरेको विज्ञप्तिमा भोटेकोसीमा आएको बाढीबाट ठूलो जनधनको क्षति भएको र १ हजार ४०० भन्दा बढीको मृत्यु तथा ५ हजारभन्दा बढी बेपत्ता भएको उल्लेख गरिएको छ। साथै, बूढीगण्डकी क्षेत्रमा आएको बाढीले पनि थप क्षति पुर्याएको जनाइएको छ।
यस्तो दुःखद परिस्थितिलाई मध्यनजर गर्दै यस वर्ष कोजाग्रत पूर्णिमाको चियापान समारोह आयोजना नगरिने कांग्रेसले स्पष्ट पारेको छ।
Discussion about this post