काठमाडौं: प्रसिद्ध नेत्र चिकित्सक डा. सन्दुक रुइटले आफ्नो जीवनको एकमात्र साधना अन्धोपन निवारण भएको भन्दै आफू कुनै पनि राजनीतिक पदमा नलाग्ने स्पष्ट पारेका छन्।
भदौ २३ र २४ मा ‘जेन-जी’ ले गरेको विरोध प्रदर्शनका क्रममा ज्यान गुमाएकाहरूप्रति सामाजिक सञ्जालमार्फत श्रद्धाञ्जली व्यक्त गर्दै उनले आफूलाई बारम्बार राजनीतिमा लाग्न प्रस्ताव आएको बताएका छन्।
उनले लेखेका छन्, “मलाई हरेक राजनीतिक उथलपुथलपछि कुनै न कुनै पदमा बसेर नेतृत्व गरिदिनका लागि अनुरोध आउने गरेको छ। तर, म प्रष्ट छु मेरो कर्म भनेको नेपाली र संसारभरका बिरामीको सेवामा आफ्नो सीप, ज्ञान र समय दिनु हो।”
डा. रुइटले आफू आफ्नो पेशा र कर्मबाटै नेपाल र नेपालीको हितका लागि सदैव योगदान दिइरहने प्रतिबद्धता व्यक्त गरेका छन्। उनले सबैलाई आफ्नो पेशामा इमान्दारीपूर्वक लागे देशको अवस्था परिवर्तन गर्न धेरै समय नलाग्ने धारणा राखेका छन्।
साथै उनले घाइतेहरूको शीघ्र स्वास्थ्यलाभको कामना गर्दै अबको समय सबै एकजुट भएर देश बनाउने रहेको आह्वान गरेका छन्।
Discussion about this post