आजबाट गौरा पर्व शुरु

सुदूरपश्चिम प्रदेशको मौलिक पर्व गौरा शुरु भएको छ । पर्वको पहिलो दिन आज व्रतालु महिलाले बिरुडा भिजाएर गौराको सुरुवात गर्ने चलन छ ।

विरुडा भनेको पाँच प्रकारका अन्न तथा गेडागुडी हुन् । त्यसैले आजको दिनलाई बिरुडा पञ्चमी पनि भनिन्छ । तामाको भाँडोलाई गाईको गोबरले लिपेर दुबो, अक्षताले सिँगारी त्यसभित्र बिरुडा राखिन्छ ।

बिरुडालाई गौरीको प्रसादका रुपमा लिइन्छ । गौरादेवीको पूजामा बिरुडा प्रयोग गरिन्छ । भदौको बिरुडा पञ्चमीदेखि गौरा पर्व विधिवत् रुपमा शुरु हुन्छ ।

यसका लागि एक महिनाअघि देखि नै शुद्ध शाकाहार र बह्मचार्यको पालना गर्नुपर्छ । यो पर्वमा पुरुषले जस्तै नारीले पनि यज्ञोपवितका रुपमा धागो लगाउने चलन छ । आजैदेखि ठाउँठाउँमा देउडा खेल्ने गरिन्छ ।