बैतडी । बैतडीको देवलहाटमा आगामी भदौ १५ गते गौरापर्व विशेष सांस्कृतिक कार्यक्रमका साथ मनाइने भएको छ । यस वर्ष पनि पर्वको मुख्य आकर्षणका रूपमा ‘लाखेनाच’ प्रस्तुत गरिने स्थानीय उद्धव सिंह मार्कण्डले बताएका छन्।
दशरथचन्द नगरपालिका-४ मा प्रत्येक वर्ष हुने लाखेनाच हेर्न टाढाटाढाबाट पनि मानिसहरू आउने गर्छन् । स्थानीय मार्कण्डका अनुसार गौरापर्वमा लाखेनाचलाई प्रमुख आकर्षणका रूपमा प्रस्तुत गरिन्छ। यो नाच स्थानीय भट्ट र मार्कण्ड जातिका पाँच वा सात जना पुरुषहरूले प्रस्तुत गर्ने गर्छन्। नाचमा सहभागी हुने पुरुषहरूले शरीरमा कपडा नलगाइकन विभिन्न पवित्र रुखका पातले शरीर ढाकेर, हातमा त्रिशूल समाती नृत्य प्रस्तुत गर्ने पुरानो परम्परा रहेको मार्कण्डले बताए।
लाखेनाचमा सहभागी हुने व्यक्तिहरूले नाच सुरु गर्नुअघि मन्दिर नजिकैको सुकनाली कुइँवामा स्नान गर्छन्। त्यसपछि, उनीहरूले आफ्नो शरीरलाई तरुलका लहरा, केराको पात र अन्य आयुर्वेदिक पातहरूले सजाउँछन्। यसरी सजिएका सहभागीहरूले कमेरो, रातो माटो र खरानीको टीका लगाएर नाच प्रस्तुत गर्ने चलन रहेको स्थानीय मार्कण्डले बताएका छन्।
यो विशेष लाखेनाच बैतडीको सदरमुकाम नजिकै रहेको देवलहाटको पञ्चदेवल मन्दिरमा गौरापर्वको अवसरमा मात्रै प्रस्तुत गरिन्छ।
Discussion about this post