काठमाडौं । अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच हुने शिखर भेटअघि अमेरिका र चीनका उच्च अधिकारीबीच आर्थिक तथा व्यापारिक विषयमा वार्ता भएको छ ।
अमेरिकी अर्थमन्त्री स्कट बेसेन्ट र चिनियाँ उपप्रधानमन्त्री हे लिफेङबीच आइतबार न्युयोर्कमा भएको वार्तामा व्यापार, कृत्रिम बुद्धिमत्ता (एआई), दुर्लभ तथा महत्वपूर्ण खनिजलगायतका विषयमा छलफल भएको हो । वार्तामा अमेरिकी व्यापार प्रतिनिधि जेमिसन ग्रियर पनि सहभागी थिए ।
दुवै देशका अधिकारीबीच भएको करिब आठ घण्टाको वार्ताले आगामी ट्रम्प–सी शिखर बैठकका लागि सम्भावित सहमतिको आधार तयार गर्ने उद्देश्य राखेको थियो । एआईसँग सम्बन्धित जोखिम तथा सुरक्षा विषयमा दुई देशबीच संवाद अघि बढाउने प्रस्तावसमेत छलफलमा आएको छ ।
अमेरिका र चीनबीच व्यापार तथा प्रविधिसम्बन्धी तनाव कायमै रहेका बेला महत्वपूर्ण खनिज, कर तथा गैर-संवेदनशील वस्तुको व्यापारलगायतका विषय पनि वार्ताको एजेन्डामा छन् । दुई देशबीचको विद्यमान व्यापार युद्धविराम नोभेम्बरमा समाप्त हुने भएकाले त्यसलाई निरन्तरता दिने विषय पनि आगामी शिखर बैठकमा महत्त्वपूर्ण बन्ने अपेक्षा गरिएको छ ।
ट्रम्प र सीबीच सेप्टेम्बर २४ मा वाशिङ्टनमा भेटवार्ता हुँदैछ । व्यापार, एआई, महत्वपूर्ण खनिज, आपूर्ति शृङ्खला तथा अन्य रणनीतिक विषयमा छलफल हुने अपेक्षा गरिएको छ ।
Discussion about this post