कञ्चनपुर – ग्रामीण स्वास्थ्य र शिक्षा सेवा गुठी (RHEST) ले जिल्ला परियोजना सल्लाहकार समितिको महत्त्वपूर्ण बैठक सम्पन्न गरेको छ। बिहीबार रेष्ट र डब्लुडिसीको आयोजना, जिल्ला समन्वय समिति कञ्चनपुरको समन्वय तथा एफजेएस इन्टरनेसनल र अमेरिकन हिमालयन फाउण्डेसनको आर्थिक सहयोगमा यो कार्यक्रम सम्पन्न भएको हो।
लामो समयदेखि बालविवाह, लैङ्गिक हिंसा, बालश्रम शोषण, चेलीबेटी बेचबिखन, असुरक्षित आप्रवासन र शिक्षाको अधिकारको क्षेत्रमा कार्यरत रेष्टले बैठकमा आफ्नो वार्षिक प्रगति र आगामी योजनाहरू प्रस्तुत गरेको थियो। यो बैठकले कञ्चनपुर जिल्लामा संस्थाले गरेका कार्यहरूको समीक्षा गर्दै भविष्यका रणनीतिहरू तय गर्न महत्त्वपूर्ण भूमिका खेलेको छ।
बैठकमा रेस्टका प्रदेश संयोजक आयुष ढकालले आर्थिक वर्षमा गरिएका सम्पूर्ण गतिविधिको बारेमा विस्तृत र तथ्याङ्कसहितको प्रस्तुति दिनुभएको थियो। उहाँले संस्थाले विभिन्न सामाजिक कुरीतिविरुद्ध कसरी काम गरिरहेको छ, विशेषगरी बालविवाह न्यूनीकरणमा हासिल गरेको सफलता र शिक्षाको पहुँच विस्तारमा पुर्याएको योगदानबारे प्रकाश पार्नुभयो। ढकालले समुदायमा सचेतना अभिवृद्धि कार्यक्रमहरू, सीमान्तकृत बालबालिकाहरूका लागि शैक्षिक सहयोग, र कानूनी सल्लाहका माध्यमबाट कसरी सकारात्मक परिवर्तन ल्याउन सफल भइरहेको छ भन्ने कुरामा जोड दिनुभयो।
कार्यक्रममा बोल्दै रेष्टका संस्थापक कमला अधिकारीले बालविवाह अन्त्य र शिक्षाको उज्यालो फैलाउन सबैको सहकार्य अपरिहार्य रहेकोमा जोड दिनुभयो। उहाँले समाजमा गहिरो जरा गाडेका अन्धविश्वास र कुरीतिहरू हटाउन समुदायस्तरबाटै सचेतना जगाउनुपर्ने आवश्यकता औँल्याउनुभयो। संस्थापकले रेस्टको स्थापनाको उद्देश्य नै समाजका हरेक वर्ग, विशेषगरी महिला र बालबालिकालाई सशक्त बनाउनु रहेको र यसका लागि सबै सरोकारवाला निकायहरूको निरन्तर सहयोगको अपेक्षा रहेको बताउनुभयो।
त्यस्तै, जिल्ला समन्वय समितिका प्रमुख दुर्गा बोहराले रेष्टले गरिरहेको उदाहरणीय कार्यको खुलेर प्रशंसा गर्दै यस्ता सामाजिक कार्यहरूलाई स्थानीय सरकारबाट सधैँ सहयोग रहने प्रतिबद्धता व्यक्त गर्नुभयो। उहाँले बालविवाह जस्ता सामाजिक अपराधले व्यक्तिगत र सामाजिक दुवै स्तरमा नकारात्मक प्रभाव पार्ने भन्दै यसको रोकथामका लागि रेष्ट जस्ता संस्थाहरूको भूमिका अतुलनीय रहेको बताउनुभयो। बोहराले समाजका विकृति हटाउन र शिक्षाको स्तर उकास्न गैरसरकारी संस्थाहरूको भूमिका महत्त्वपूर्ण हुने र सरकारले उनीहरूसँग सहकार्य गर्न सधैँ तयार रहेको बताउनुभयो।
त्यस्तै कार्यक्रममा रेष्टले नै निःशुल्क पढाएकी बिमला भट्टले आफ्नो अनुभव सुनाउनुभयो। उहाँले रेस्टको सहयोगले आफूले शिक्षा प्राप्त गर्ने अवसर पाएको र यसले आफ्नो जीवनमा ठूलो परिवर्तन ल्याएको बताउनुभयो। भट्टले रेस्टलाई धन्यवाद दिँदै यस्ता कार्यक्रमले धेरै विपन्न बालबालिकालाई भविष्य बनाउन मद्दत पुग्ने विश्वास व्यक्त गर्नुभयो। उहाँको अनुभवले शिक्षाको महत्त्व र रेष्ट जस्ता संस्थाहरूले समुदायमा पार्ने सकारात्मक प्रभावलाई प्रष्ट पारेको छ।
रेष्टले कञ्चनपुर जिल्लामा १५ विद्यालयका ४९१ विद्यार्थीका लागि सफलतापूर्वक कार्यक्रम सञ्चालन गरिरहेको छ। यसअन्तर्गत कृष्णपुर नगरपालिकाको वडा नम्बर २ र ४ मा तथा भीमदत्त नगरपालिकाको वडा नम्बर २, ४, ७, ८, ९, १०, १२, १५ र १८ मा कार्यक्रम सञ्चालनमा रहेको छ। यसले विशेषगरी शिक्षाबाट वञ्चित भएका र सामाजिक जोखिममा रहेका बालबालिकालाई लक्षित गरेको छ, जसलाई विद्यालयमा नियमित उपस्थित गराउनुका साथै उनीहरूको सर्वाङ्गीण विकासका लागि विभिन्न अतिरिक्त क्रियाकलापहरूमा समेत संलग्न गराउँदै आएको छ। रेष्टको यो पहलले कञ्चनपुरका बालबालिकाहरूको उज्ज्वल भविष्य निर्माणमा महत्त्वपूर्ण योगदान पुर्याइरहेको छ।
Discussion about this post