कञ्चनपुर । नोट स्विफ्टले सुदूरपश्चिम प्रदेशका युवाहरूको क्षमता उजागर गर्न र उनीहरूको भविष्य निर्माणमा सशक्त योगदान पुर्याउने उद्देश्यले “सपनाको उडान २०८२” कार्यक्रम सफलतापूर्वक सम्पन्न गरेको छ। “जहाँ सपनाले उडान भर्ने गर्छन्” भन्ने मूल नाराका साथ प्रस्तुत गरिएको यो कार्यक्रम कुनै साधारण भेला भन्दा फरक रहेको आयोजकले बताएका छन्।
यो कार्यक्रम सुदूरपश्चिमका युवाहरूको अप्रयुक्त क्षमता, साहसी आवाज र रचनात्मक ऊर्जाको उत्सवको रूपमा आयोजना गरिएको थियो। यसले युवाहरूलाई आफ्नो भविष्यको स्पष्ट चित्र कोर्न, आत्मविश्वास बढाउन र जीवनको अर्को अध्यायमा अग्रसर गराउने लक्ष्य राखेको थियो।
कार्यक्रममा अनुभवी व्यक्तित्वहरूसँग करियर प्यानल छलफल, एक-एक गरी गरिने करियर परामर्श, तथा सीप विकास र आत्मपरिवर्तनका विषयमा विशेष सत्रहरू सञ्चालन गरिएका थिए। यसबाट विद्यार्थीहरूले आफ्नो रुचि, क्षमता र लक्ष्यअनुसार मार्गदर्शन प्राप्त गर्नेछन्, जसले उनीहरूलाई अध्ययन तथा पेसा छनोटमा सजिलो बनाउने विश्वास आयोजकको छ।
साथै, कार्यक्रममा नेता, प्रशिक्षक, सामाजिक अभियन्ता र प्रेरक वक्ताहरूसँग भेटघाट (नेटवर्किङ) गर्ने अवसर पनि प्रदान गरिएको थियो। यसले युवाहरूको सामाजिक र पेसागत सञ्जाल विस्तारमा मद्दत पुर्याउने विश्वास लिइएको छ।
कार्यक्रममा शैक्षिक र करियरमूलक विषयका साथै, कार्यक्रममा मनोरञ्जनात्मक तथा सांस्कृतिक पक्षहरूलाई समेत महत्व दिइएको नोट स्विफ्टका सिओओ बिशाल भट्टले बताएका छन्।
उनका अनुसार विद्यार्थीहरूको मनोरञ्जनका लागि गेमिङ र रमाइलो क्षेत्र (फन जोन) लगायत रमाइला गतिविधिहरूको व्यवस्थासहित स्थानीय युवा कलाकारहरूद्वारा प्रस्तुत संगीत, नृत्य, हास्य प्रस्तुति (स्ट्यान्डअप कमेडी), र कलाका विविध प्रस्तुतिहरू समेत रहेका थिए। यी सबै प्रस्तुतिहरू सुदूरपश्चिमका ग्रामीण क्षेत्रका प्रतिभाहरूलाई उजागर गर्न लक्षित रहेको उनले बताए।
अर्कोतर्फ, कार्यक्रमको प्रविधि प्रदर्शनी (टेक शोकेस) खण्डमा विद्यार्थीहरूले बनाएका नयाँ आविष्कार तथा परियोजनाहरू प्रदर्शन गरिएका थिए, जसले उनीहरूको सिर्जनशीलता र नवप्रवर्तन क्षमतालाई अभिव्यक्त गर्ने मञ्च प्रदान गरेको थियो। यसका साथै, योग्य विद्यार्थीहरूका लागि छात्रवृत्तिको अवसर पनि कार्यक्रममार्फत प्रदान गरियो, जसले उनीहरूको शैक्षिक यात्रालाई सहज बनाएको छ।
नोट स्विफ्टका संस्थापक विकास पाण्डेले सुदूरपश्चिमका युवाहरूमा लुकेको असीमित सम्भावनालाई बाहिर ल्याउन र उनीहरूलाई सही दिशा दिनु नै ‘सपनाको उडान २०८२’ को मुख्य लक्ष्य रहेको बताए।
विशेष गरी एसईई (SEE) र प्लस टु (+२) तह सकाएका विद्यार्थीहरूका लागि यो कार्यक्रम जीवन परिवर्तनको मोड साबित हुन सक्ने आयोजकको विश्वास छ। उनीहरूलाई आगामी निर्णयहरूमा स्पष्टता, आत्मविश्वास र व्यवहारिक उपायहरू प्रदान गर्नु नै यस कार्यक्रमको मुख्य उद्देश्य हो।
Discussion about this post