बागलुङ । नेपालको एकमात्र सिकार आरक्ष क्षेत्र ढोरपाटन पुग्ने पर्यटकको सङ्ख्या पछिल्लो समय उल्लेख्य रूपमा बढेको छ। आर्थिक वर्ष २०८२र८३ मा ३७ हजार ५२० पर्यटक ढोरपाटन पुगेका छन्। तीमध्ये ३७ हजार २७० जना नेपाली पर्यटक रहेका ढोरपाटन सिकार आरक्ष कार्यालय, बागलुङले जनाएको छ।
आरक्ष कार्यालयका रेञ्जर सागर सुवेदीका अनुसार एक वर्षमै ढोरपाटन पुग्ने पर्यटकको सङ्ख्या करिब १३ हजारले बढेको हो। आर्थिक वर्ष २०८१र८२ मा २३ हजार ६९२ र २०८०र८१ मा १५ हजार ५७३ पर्यटक ढोरपाटन पुगेका थिए।
पर्यटकीय पूर्वाधार निर्माण, प्रचारप्रसार, होटल तथा होमस्टेको विकास, बुकीपाटन र बुकीफूलको चर्चा तथा जलजलामा पदयात्रा गर्ने पर्यटकको सङ्ख्या बढेसँगै ढोरपाटनमा आन्तरिक पर्यटकको आगमन बढेको रेञ्जर सुवेदीले बताउनुभयो।
पर्यटकको सङ्ख्या बढेसँगै आरक्षको राजस्वसमेत वृद्धि भएको छ। आर्थिक वर्ष २०८२र८३ मा पर्यटक प्रवेश शुल्कबाट मात्रै रु ४७ लाख ६८ हजार ४०५ राजस्व सङ्कलन भएको छ। अघिल्लो आर्थिक वर्ष २०८१र८२ मा प्रवेश शुल्कबाट रु ३१ लाख २१ हजार ५०० राजस्व सङ्कलन भएको थियो।
आरक्षले नेपाली तथा आन्तरिक पर्यटकका लागि रु १००, सार्क राष्ट्रका पर्यटकका लागि रु १ हजार ५०० र अन्य विदेशी पर्यटकका लागि रु ३ हजार प्रवेश शुल्क लिँदै आएको छ। त्यस्तै, ढुङ्गा, गिट्टी र बालुवाबाट आर्थिक वर्ष २०८२र८३ मा रु १ करोड १ लाख २७ हजार ९५३ राजस्व सङ्कलन भएको छ।
पछिल्लो समय विदेशी पर्यटक सिकार खेल्न मात्र नभई ढोरपाटन उपत्यका, निशेलढोर, ढोरबराह मन्दिर, बुकीपाटन र जलजला क्षेत्रको अवलोकन तथा पदयात्राका लागि समेत आउने गरेका छन्। समुद्री सतहबाट करिब २ हजार ९०० मिटर उचाइमा रहेको ढोरपाटन उपत्यकादेखि ४ हजार मिटरभन्दा माथिको बुकीपाटनसम्म पर्यटक पुग्न थालेका छन्।
पर्यटकका लागि शुल्क तिरेर पालसहित बस्न सक्ने व्यवस्था पनि मिलाइएको आरक्ष कार्यालयले जनाएको छ। प्रचारप्रसारसँगै पर्यटकीय सूचना प्रणाली, पदमार्ग र अन्य पूर्वाधार विस्तार हुँदै गएपछि आगामी दिनमा ढोरपाटनमा पर्यटकको सङ्ख्या अझ बढ्ने अपेक्षा गरिएको छ।
Discussion about this post