कञ्चनपुर । वेदकोट नगरपालिका वडा नम्बर -७ सुडामा अवस्थित घटाल माध्यमिक विद्यालयका पूर्व प्रधानाध्यापक कृष्ण भण्डारीको अवकासपछि भव्य विदाई गरिएको छ । २०४७ साल भदौ ७ गतेदेखि शिक्षण पेसामा प्रवेश गरेका भण्डारीले ३४ वर्ष लामो अवधिसम्म शिक्षा क्षेत्रमा अमूल्य योगदान पुर्याएर २०८१ फागुन १६ गते अवकास लिनुभएको थियो ।
शुक्रबार आयोजित एक विशेष समारोहमा भण्डारीलाई स्थानीय समुदाय, विद्यालय परिवार र समाजसेवीहरूले भावपूर्ण विदाई गरेका छन् । स्थानीय समाजसेवी नरेश भट्टका अनुसार उनलाई फूलमाला, खादा र सम्मानपत्र प्रदान गरी विशेष सम्मान गरिएको थियो । कार्यक्रममा सहभागीहरूले भण्डारीको शिक्षण पेसाप्रतिको समर्पण, विद्यार्थीप्रतिको माया र विद्यालयको विकासमा पुर्याएको योगदानको खुलेर प्रशंसा गरे ।
विदाई समारोहमा भण्डारीलाई गाडीमा ब्याण्डबाजासहित घरसम्म पुर्याएर सम्मानपूर्वक बिदा गरिएको भट्टले बताउनुभयो । यो अवसरमा स्थानीयवासी, शिक्षक, विद्यार्थी र अभिभावकहरूको उल्लेख्य उपस्थिति रहेको थियो । भण्डारीले आफ्नो कार्यकालमा विद्यालयको शैक्षिक गुणस्तर वृद्धि, अनुशासन कायम र सामुदायिक एकताका लागि गरेको योगदानलाई सबैले स्मरण गरे ।
कृष्ण भण्डारीले आफ्नो विदाई समारोहमा सबैलाई धन्यवाद दिँदै शिक्षण पेसालाई आफ्नो जीवनको अभिन्न अंग भएको बताउनुभयो । उनले आगामी दिनमा पनि सामाजिक कार्यमा सक्रिय रहने प्रतिबद्धता व्यक्त गर्नुभयो । यो समारोहले उनको योगदानको कदर गर्दै स्थानीय समुदायमा एकताको सन्देश प्रवाह गरेको छ ।
Discussion about this post