काठमाण्डाै – प्रतिनिधिसभामा आउँदो आर्थिक वर्ष २०८२/८३ को सरकारको वार्षिक नीति तथा कार्यक्रममाथि छलफल शुरू भएको छ । राष्ट्रपति रामचन्द्र पौडेलले गएको शुक्रवार सङ्घीय संसद्को दुवै सदनको संयुक्त बैठकमा प्रस्तुत गर्नुभएको नीति तथा कार्यक्रममाथि प्रतिनिधिसभामा आजदेखि छलफल शुरू भएको हो ।
नीति तथा कार्यक्रममाथि धारणा राख्दै नेकपा (माओवादी केन्द्र) का अध्यक्ष पुष्पकमल दाहाल प्रचण्डले नीति तथा कार्यक्रमलाई औपचारिक र कर्मकाण्डी मात्रै बनाएको टिप्पणी गर्नुभयो । उहाँले नीति तथा कार्यक्रम सच्याउन आग्रह पनि गर्नुभएको छ ।
गएको वर्ष नीति तथा कार्यक्रममाथि लोकतान्त्रिक विधिबाट व्यापक छलफल र बहस गरेर अन्तिम रूप दिन खोजिएको भए पनि यस वर्ष सरकारले त्यो प्रक्रिया भत्काएको अध्यक्ष प्रचण्डले जिकिर गर्नुभयाे । सांसदहरूको सुझाव समेटिएर परिमार्जन भई त्यहीअनुरूप बजेटमा प्रतिविम्बित हुनसक्ने कुरामा सरकारले बेवास्ता गरेको उहाँको भनाइ छ ।
राष्ट्रियसभामा भने नीति तथा कार्यक्रममाथिको छलफल हिजैदेखि शुरू भइसकेको छ ।
Discussion about this post