कञ्चनपुर । कञ्चनपुरको वेदकोट नगरपालिका वडा नम्बर ८ गैलनदीमा पहिलो पटक रामलीला महोत्सव सुरु भएको छ । बुधबारदेखि गैलनदीमा रामलीला महोत्सव सुरु भएको हो । मर्यादा पुरुषोत्तम भगवान रामचन्द्रको जीवनमा आधारित रामलीला महोत्सव २०८१ सुरु भएको आयोजकले जनाएको छ । बैजनाथ सिद्धनाथ रामलीला समिति गैलनदीले निङ्लाशैनी जगन्नाथ रामलीला समितिसंगको मुख्य सहकार्यमा वेदकोट ८ वडा कार्यालयको प्राङ्गणमा शुरु भएको रामलीला महोत्सवको गृहमन्त्री रमेश लेखकले उद्घाटन गरेका छन् ।
महोत्सवको उद्घाटन गर्दै गृहमन्त्री लेखकले समाजिक सद्भावदेखि समाज सुधारका क्षेत्रमा अनुशरणमा गृहमन्त्री लेखकले जोड दिएका छन् । गृहमन्त्री लेखकले रामलीलाका माध्यमबाट कुलतमा लागेका युवापुस्तालाई समाज सुधारमा जोड दिए । बैजनाथ सिद्धनाथ रामलीला समितिका संयोजक एवम् वेदकोट ८ का वडाध्यक्ष महेशराज जोशीले पहिलो पटक वडा नम्बर ८ मा रामलीला सञ्चालन गर्न लागिएको बताए । संयोजक जोशीले वेदकोट ८ कै उत्तरी क्षेत्र ज्येष्ठ नागरिक बाल धार्मिक वनको वृद्धि विकासका लागि, नैतिक शिक्षा, रामजस्तै आर्दश पुरुषको विकास गर्न, सामूहिक सद्भाव, भाइचारा भावनाका लागि रामलीला सञ्चालन गर्न लागेको बताए । ‘हाम्रो वेदकोट नगर उस्तै पनि धार्मिक पर्यटकीय क्षेत्र भएको नगरपालिका हो, ‘उनले भने, ‘धार्मिक पर्यटन प्रर्बद्धनका लागि हामीले महोत्सव पनि सञ्चालन गर्न लागेका हौँ ।’
उनले रामजानकी विवाह पञ्चमीकै दिनदेखि सुरुवात हुने रामलीलाको गृहमन्त्री रमेश लेखकको प्रमुख आतिथ्यमा उद्घाटन हुनेछ । निङ्गलाशैनी जगन्नाथ रामलीला समितिका सह संयोजक भानदेव भट्टले ०७० सालमा वेदकोट नगरकै सुडामा सञ्चालन भएको रामलीलाबाटै अनुशरण गरेर ०७१ देखि गोबरैयामा निरन्तर सञ्चालन गरिरहेको बताए । आफूहरूले यस पटक वेदकोट नगरको गैलनदीमा सञ्चालन हुने रामलीला प्रभावकारी बनाउने उद्घोष गरेका छन । निङ्गलाशैनी जगन्नाथ रामलीला समितिका सचिव पदमराज भट्टले समाजको विकाससँगै आध्यात्मिक विकासको खाँचो रहेको बताए । उनले रामलीलाको माध्यमबाट समाज सुधारका कार्यक्रम सञ्चालन गरिने बताए ।
बैजनाथ सिद्धनाथ रामलीला समिति गैलनदीका मुख्य संरक्षक एवम् वेदकोट नगरकी उपप्रमुख तुलसी जोशीले समाज सुधारका लागि आध्यात्मिक तरिका आवश्यक रहेको औंल्याएकी छिन् । उनले समाजलाई आध्यात्मिक विषयमा जोड्दै समाजिक विकृति हटाएर समुन्नत समाज निर्माणमा भूमिका निर्वाह गरिने बताइन । उपप्रमुख जोशीले आफूले रामलीला सम्पन्न गर्नका लागि आर्थिक, भौतिक, नैतिक रुपमा सहयोग गर्ने प्रण गरेकी छिन । पहिलो पटक गाउँमै रामलीला सञ्चालन हुन लागेपछि स्थानीय समेत हर्षित भएका छन् । बैजनाथ सिद्धनाथ रामलीला समितिका सचिव महाबिर बमले १८ मङ्सिरसम्म सञ्चालन हुने रामलीला महोत्सवको अवलोकनका लागि आयोजकले आव्हान गरेका छन ।
उद्घाटन समारोहमा कञ्चनपुरका प्रमुख जिल्ला अधिकारी नारायण प्रसाद सापकोटा लगायतका कर्मचारी, सुरक्षा निकायका प्रमुख एवम् प्रतिनिधि, स्थानीय जनप्रतिनिधिहरू, पत्रकार, कलाकार तथा भक्तजनहरूको उपस्थिति रहेको थियोे । त्यसैगरी कार्यक्रममा ज्येष्ठ नागरिक लगायत सामाजिक विकासमा योगदान पुर्याउनु भएका विभिन्न व्यक्तिहरूलाई सम्मान समेत गरिएको छ।
