कञ्चनपुर – कञ्चनपुरको भीमदत्त नगरपालिका गड्डाचौकीमा दोस्रो मेयर कप डे- नाईट टि-१० क्रिकेट प्रतियोगिता शुरु भएको छ । भीमदत्त नगरपालिका ११ नम्बर वडा कार्यालयको आयोजनामा आइतबारदेखि प्रतियोगिता शुरु भएको हो । 
गड्डाचौकीको सिद्धनाथ अमर माध्यामिक विद्यालयको प्राङ्गणमा सञ्चालन भएको दोस्रो मेयर कप डे–नाइट क्रिकेट प्रतियोगिताको भीमदत्त नगरका मेयर पदम बोगटीले उद्घाटन गरेका थिए । प्रतियोगिता उद्घाटन गर्दै मेयर बोगटीले क्रिकेट क्षेत्रको बृद्धि विकासका लागि भीनपा ११ वडाले गरेको कामको प्रसंसा गर्दै पालिकाबाट सक्दो सहयोग गर्ने प्रतिबद्धता जाहेर गरेका छन् ।
भीमदत्त नगरपालिका ११ का वडाध्यक्ष एव प्रतियोगिताका संरक्षक प्रकाश थापाले नगर क्षेत्रको क्रिकेटको वृद्धि विकास, खेलाडी उत्पादन गर्न, गड्डाचौकी क्षेत्रको पर्यटन प्रर्वद्धन सहित विविध नगरको समृद्धिका लागि आफूले चुनाव जितेपछि हरेक वर्ष क्रिकेट प्रतियोगिता आयोजना गर्दै आएको बताए । वडाध्यक्ष थापाका अनुसार यस पटक विजेतालाई २ लाख, ५१ हजार, उपविजेतालाई १ लाख २१ हजार नगद सहित ट्रफी, प्रमाण पत्र र उत्कृष्ट खेलाडीलाई विविध पुरस्कार दिइनेछ।
त्यसैगरी आईतबार भएको उद्घाटन खेलमा भीमदत्त -५ र भीमदत्त -८ ले विजयी सुरुवात गरेको छ । भीमदत्त -५ ले भीमदत्त -६ (ए) लाई १४ रनले र भीमदत्त -८ ले सीएमजी क्लबलाई ६ विकेटले हराउँदै पहिलो जित हात पारेको हो। पहिलो खेलका म्यान अफ द म्याच भीमदत्त ५ का चन्द्र देव बिष्ट भएका छन् भने दोस्रो खेलबाट भीमदत्त ८ का दिनेश धामी म्यान अफ द म्याच हुन् सफल भएका छन्।
Discussion about this post