कञ्चनपुरलाई औद्योगिक क्षेत्रको हब बनाउछु : मन्त्री भण्डारी

दैजी (कञ्चनपुर)। उद्योग वाणिज्य तथा आपूर्तिमन्त्री दामोदर भण्डारीले शुक्रबार बिहान बेदकोट नगरपालिका–२ स्थित दैजी–छेला औद्योगिक क्षेत्रको निरीक्षण गरेका छन्।

बम
उक्त क्षेत्रको निरीक्षणपछि बेदकोट उद्योग वाणिज्य संघले आयोजना गरेको अन्र्तक्रिया कार्यक्रममा मन्त्री भण्डारीले दैजी–छेला औद्योगिक क्षेत्र सञ्चालनलाई सरकारले उच्च प्राथमिकतामा राखेको र ढिलोमा दुई साताभित्र भोगाधिकार कायम हुने गरी काम भइरहेको जानकारी दिए।

‘मैले मन्त्रालय सम्हालेको एक महिनामै औद्योगिक क्षेत्र कार्यान्वयनको चरणमा प्रवेश गरेको छ,’ मन्त्री भण्डारीले भने, ‘यसबारे कार्यदलले एक हप्ताभित्र प्रतिवेदन पेश गर्नेछ। त्यो प्रतिवेदन क्याबिनेटमा पेश गरी भोगाधिकार हस्तान्तरणको निर्णय गराउँछु।’

मन्त्री भण्डारीले भोगाधिकार पाएपछि बाँकी प्रक्रिया अघि बढ्ने बताए। त्यसका लागि ५ अर्ब बढी बजेट माग गरिएको उनले जानकारी दिए।

‘कञ्चनपुरलाई औद्योगिक क्षेत्रको हब बनाउछु,’ मन्त्री भण्डारीले भने, ‘सरकार नीजि क्षेत्रको साथमा छ। नीतिगत सुधार गरी लगानी मैत्री वातावरण निर्माण गर्नका लागि मन्त्रालय धमाधम काम गरिरहेको छ।

उनले गेटा मेडिकल कलेजलाई सरकारले सहिद दशरथ चन्द राष्ट्रिय स्वास्थ्य विज्ञान विश्वविद्यालय नामकरण गरी देशकै पहिलो स्वास्थ्य विज्ञान विश्वविद्यालय बनाएको, दोधाराचाँदनीमा सुख्खा बन्दरगाहको काम अगाडि बढेको र महाकाली करिडोरको काम पनि निक्कै अगाडि बढेको जनाउदै यी योजना पूरा भएमा सुदूरपश्चिमका जनताले कामका लागि भारत जानुपर्ने बाध्यताको अन्त हुने बताए।

कार्यक्रममा बेदकोट उद्योग वाणिज्य संघका अध्यक्ष शंकर चन्दले २०५२ सालदेखि दैजीमा ओद्योगिक क्षेत्र स्थापनाका लागि पहल थालिएपनि अहिले त्यसले मुर्तरुप लिएको बताए।

‘यहाँ औद्योगिक क्षेत्र स्थापना गर्नका लागि सबै राजनीतिक दलहरु एकवद्ध छन्,’ उनले भने, ‘यसै क्षेत्रको माननीय ज्यू उद्योग वाणिज्य मन्त्री हुनु भएकाले छिटो कार्यान्वयनको चरणमा जानेमा आशावादी छौँ।’

नेपाल इटा व्यवसायी महासंघका अध्यक्षसमेत रहेका चन्दले छिमेकमै रहेको भारतको रुद्रपुरबाट सामान मगाउँदा पनि भैरहवा र बीरगञ्ज नाका भएर यहाँ पुग्ने भएकाले सुख्खा बन्दरगाह निर्माणले त्यो बाध्यताको अन्त हुने अपेक्षा गरेको बताए।

बेदकोट उद्योग वाणिज्य संघका महासचिव रामचन्द्र रेग्मीले औद्योगिक क्षेत्र स्थापना भएमा यसले बेदकोट मात्र होइन्, समग्र जिल्ला र प्रदेशको विकासमा कोषेढुंगा साबित हुने भएकाले सबैको सामुहिक प्रयास र प्रयत्नद्धारा यो कार्यलाई सफल बनाउन जुटनु पर्ने बताए।

कार्यक्रममा नेपालगञ्ज औद्योगिक क्षेत्रका सहायक निर्देशक कृष्ण पुनले अहिले रुख छपानको कार्य सञ्चालन भइरहेको र यही ८ गतेका दिन दैजीमा औद्योगिक क्षेत्रको कार्यालय स्थापना हुने जानकारी दिएका छन्। सिमारेखा बाट सभार