गएको बर्ष सेती नदीमा आएको बाढीले बगाएको झोलुंगे पुल पुनःनिर्माण नभएपछि डोटीका नागरिकले सेती नदीमा काठेपुल निर्माण गरेका छन् । बेमौसमी बर्षाका कारण सेती नदीमा आएको बाढीले झोलुंगे पुल बगाएको भएपनि पुल पुनःनिर्माणमा कसैले ध्यान नदिँदा स्थानीयहरुले काठेपुल निर्माण गरेका छन् ।
बैतडीको सिगास गाउँपालिका वडा नं ७ को भौनेली पातल र डोटीको आदर्श गाउँपालिका ६बबिना पाङ जोड्ने झोलुंगे पुल बाढीले बगाएपछि स्थानीयबासीहरु मार्कामा परेका थिए । आवतजावतमै समस्या भएपछि दुवै क्षेत्रका नागरिक मिलेर सेती नदीमाथि काठेपुल निर्माण गरेको स्थानीय समेत रहेका शिक्षक पदम साउँदले बताए ।
बाढीले बगाएको झोलुंगे पुल निर्माणको आश्वासन धेरै ठाउँबाट पाएको तर पुल कसैले नबनाउँदा आफूहरु मिलेर काठेपुल निर्माण गरेको स्थानीय मानबहादुर बोहराले बताए । उनले भने ‘सेती नदीमा पुल नहुँदा हामीहरुलाई धेरै समस्या भएको छ । यताउता जान समस्या भएपछि हामी दुवै ठाउँका स्थानीयहरु मिलेर सेती नदीमा काठेपुल हालेका छौं ।’
सेती किनारका नागरिकको बैतडी र डोटी दुवै जिल्लामा बसोबास भएकाले उनीहरुले पुल नबन्दा काठेपुल निर्माण गरेका हुन् ।
२०७८ सालको बेमौसमी बर्षाले पुल बगाउँदा आवतजावतमा समस्या भएको स्थानीयहरुले बताएका छन् । सिगास गाउँपालिका वडा नं ७ का बासिन्दाको डोटीको आदर्श गाउँपालिकामा समेत बसोबास भएकाले उनीहरुलाई पनि आवतजावतमा निकै समस्या भएको छ । सिगाससंग सीमाना जोडिएको आदर्श गाउँपालिकाका बालबालिकाहरु बैतडीमा पठनपाठनका लागि विद्यालय आउने भएपनि पुलको अभावमा उनीहरु टाढाको विद्यालय जान बाध्य भएका शिक्षक साउँदले बताए ।
भौनेलीपातलमा बाढीले बगाएको पुल निर्माणका लागि मुख्यमन्त्री, मन्त्री र सांसद सबैले आश्वासन दिएपनि कसैले काम नगरेको स्थानीयहरुको गुनासो रही आएको छ । बाढी प्रभावित क्षेत्रमा प्रधानमन्त्री समेत पुगेर भत्केका संरचना निर्माण गर्ने आश्वासन दिएको भएपनि कसैले काम नगरेको स्थानीय धर्मसिंह बोहराले बताए । उनले भने ‘त्यो बेला सबै नेताहरु आए । प्रधानमन्त्री आए, मन्त्री आए तर कसैले समस्याको समाधान गरेन् ।’ सगुन खबर बाट सभार
Discussion about this post