सुदूरपश्चिमकै ट्रेड आन्दोलनका एक अगुवा नेताको रुपमा चिनिने नाम हो धर्मानन्द पन्त । २०४८ को प्रतिनिधिसभाको निर्वाचनपछि काँग्रेसको सरकार बन्यो । प्रधानमन्त्री गिरिजाप्रसाद कोइराला र गृहमन्त्री शेर बहादुर देउवा थिए । कोइराला सरकारले निजामति कर्मचारीमाथि गरेको ज्यादतीविरुद्ध आन्दोलन चर्कियो । कञ्चनपुरमा सवारी चालकको रुपमा कार्यरत धर्मानन्द पन्त पनि आन्दोलनमा होमिए ।
काँग्रेसकै नेताहरुको सुराकमा सरकारले उनलाई नौकरीबाट निकाल्यो । त्यसपछि मजदुरहरुलाई संगठित गर्दै नेपाल ट्रेड युनियन महासंघको महाकाली अञ्चलको नेतृत्वमा पुगे । त्यसपछि केन्द्रीय नेतृत्वमा समेत पुगे । सालघारी क्षेत्रका सुकुम्बासी मजदुरहरुको हकहितका लागि पनि पन्तले लामो समय आन्दोलन गरे । तत्कालिन नगर विकास समिति विरुद्ध सुकुम्बासीलाई जमिन उपलब्ध गराउन माग गर्दै उनकै नेतृत्वमा आन्दोलन समेत चल्यो ।
नेता पन्तको मृत्युपछि मजदुरको नेतृत्व छोरो महेश प्रशाद पन्तले लिए । उनी पनि मजदुरको हकहितसंगै जमिन उपलब्ध गराउन निरन्तर आन्दोलनमै छन् । मजदुर नेताको विरासत थामेका तिनै पन्त अहिले भीमदत्त नगरपालिकाको मेयर पदमा उम्मेदवार बनेका छन् । पन्तलाई नेकपा एमालेले भीमदत्त नगरपालिकाको प्रमुखको उम्मेदवार बनाएको छ । युवा र विद्यार्थीमाझ लोकप्रिय पन्त जनज्योति काण्डका ज्युदा शहीदका नामले चिनिन्छन् ।
२०५८ मा राजा ज्ञानेन्द्रले कु गर्दै सत्ता हातमा लिएर संकटकाल घोषणा ग¥यो । राजनीतिक दलका नेताहरुलाई नजरबन्दमा राख्न थालियो । सेनाको गतिविधिहरु बढन थाले । सर्वसाधारणदेखि राजनीतिक दलका नेताहरु समेत त्रसित हुन थालेका थिए । सोही समयमा अनेरास्ववियुका नेताहरु महेश पन्त, बचन बहादुर सिंह र नरबहादुर धामीले कञ्चनपुरमा राजाको कु विरुद्ध आन्दोलन चर्काउनुपर्नेमा केन्द्रित भए । यहि विषयमा जनज्योति बहुमुखी क्याम्पसमा अनेरास्ववियुको भेला आयोजना गरिएको थियो । भेला स्थलमा चारैतिरबाट ततकालिन शाही नेपाली सेनाले घेरा हाल्यो । अन्धाधुन्ध गोली चल्यो । पन्तलाई सुताएर खुट्टामा गोली हानियो ।
लामो समयको उपचारपछि केही सन्चो लागेका पन्तको शरिरमा अहिले पनि गोलीका छर्रा छन् । तिनै गोलीका छर्रा उनि चुनावि घरदैलो अभियानमा दौडिरहेका छन् । मावि तहमा अध्ययनरत पन्तलाई पनि बुवामाथि भएको अन्यायबारे सबै थाहा थियो । त्यहि कारणले उनी उच्च तहमा अध्ययन गर्दा अनेरास्ववियुमा संगठित भए । उच्च शिक्षा अध्ययनकै क्रममा उनी २०६२ मा तत्कालिन सिद्धनाथ बहुमुखी क्याम्पसको स्ववियु सभापति समेत भए । अनेरास्ववियुमा आबद्ध भएदेखि उनले जिल्लामा निरन्तर संगठन सुदृढिकरणमा योगदान दिइरहे । त्यसकै फलस्वरुप उनी सहजै स्ववियु सभापति समेत हुन सफल भए ।
कानुनमा स्नातक महेश शैक्षिक रुपमा पनि अब्बल मानिन्छन् । जिल्लाकै पुरानो र ठुलो नगरपालिकाको नेतृत्व लिन यतिबेला पन्त घरदैलो कार्यक्रममा छन् । उनले सुशासनदेखि विकास निर्माणका विभिन्न योजनाहरु अघि सारेका छन् । ‘विद्यार्थी अवस्थादेखि नै विपन्न र मजदुरका लागि लडिरहेको छु, अब नगरपालिकामा पनि नमुना विकास गरेर देखाउन सक्छु,’ उनले भने, ‘बुवादेखि न्यायको लडाइमा लागेका हामीले यो क्षेत्रका जनताको माया पाउनेमा विश्वस्त छु ।’
Discussion about this post