काठमाडौं – नारायणगढ-बुटवल सडक विस्तार आयोजना अन्तर्गत पूर्वी खण्डको दाउन्ने क्षेत्रमा सडकको एकतर्फी ढलानको काम सम्पन्न भएको छ।
आयोजनाका सूचना अधिकारी शिव खनालका अनुसार दाउन्नेमा करिब चार किलोमिटर क्षेत्रमा एकतर्फी ढलानको काम सकिएको हो। अब चाँडै उक्त क्षेत्रमा पक्की सडकबाटै सवारी सञ्चालन हुने जनाइएको छ।
दाउन्नेमा ढलानको काम नसकिँदा सामान्य वर्षा हुँदा पनि सवारी जामको समस्या हुने गरेको थियो। अब चौध दिनपछि पूर्वी खण्डमा ढलान गरिएको सडकबाट यात्रा गर्न सकिने सूचना अधिकारी खनालले बताए।
उनका अनुसार दाउन्नेमा एकतर्फी ढलान सकिएसँगै नारायणगढ–बुटवल सडक आयोजनाको पूर्वी खण्डअन्तर्गत पुरै ६५ किलोमिटर सडक कालोपत्र र पक्की सडकले जोडिएको छ।
यद्यपि पश्चिम खण्डमा भने अझै पूर्ण रूपमा ढलानको काम सकिएको छैन।
नारायणगढ–बुटवल सडक विस्तारको काम २०७५ माघ २४ गते सम्झौता भई २०७९ साउन २२ गते सम्पन्न गर्ने लक्ष्यसहित सुरु गरिएको थियो। निर्धारित समयमा काम नसकिएपछि पटक–पटक म्याद थप गरिएको छ। हाल चौथो पटक थपिएको म्यादमा काम अघि बढिरहेको छ।
एसियाली विकास बैंकको ऋण सहयोगमा सञ्चालित यस योजनाको दुवै खण्ड गरी कुल लागत करिब १७ अर्ब रुपैयाँ रहेको छ।
Discussion about this post