काठमाडौँ । नेपाली कांग्रेसले संसद् अधिवेशन स्थगित गरी अध्यादेशमार्फत शासन चलाउने सरकारको कदमप्रति असहमति जनाएको छ । पार्टीका प्रवक्ता देवराज चालिसेले संसद्लाई छलेर अध्यादेश ल्याउनु लोकतन्त्रको मर्यादाविपरीत भएको बताउनुभयो । उहाँले संसदीय व्यवस्था र लोकतान्त्रिक अभ्यासविपरीतका काम नगर्न सरकारलाई आग्रह गर्नुभयो ।
कांग्रेसले पेट्रोलियम पदार्थको मूल्यवृद्धि र त्यसको असरले बजारमा देखिएको मनोमानीप्रति पनि चिन्ता व्यक्त गरेको छ । प्रवक्ता चालिसेले सीमा नाकामा देखिएको समस्या र मूल्यवृद्धिका कारण सर्वसाधारणको दैनिक जीवन प्रभावित भएको उल्लेख गर्दै कडाइका साथ बजार अनुगमन गर्न सरकारको ध्यानाकर्षण गराउनुभयो ।
यसैबीच पार्टीका महामन्त्री प्रदीप पौडेलले जनमत प्राप्त सरकारले अलोकप्रिय हुने कार्य नगर्नुपर्ने बताउनुभएको छ ।
केन्द्रीय समिति बैठकमा सहभागी हुनुअघि उहाँले अतिक्रमित संरचना हटाउने सरकारी अभियानमा पर्याप्त पूर्वतयारी नभएको जस्तो देखिएको उल्लेख गर्दै नागरिकलाई सास्ती हुने अवस्था सिर्जना हुन नदिनुपर्नेमा जोड दिनुभयो ।
Discussion about this post