प्रगतिशीलको पक्षमा निर्वाचन परिणाम आउँछ : वरिष्ठ अधिवक्ता विष्णुमणी अधिकारी

वरिष्ठ अधिवक्ता एवं आसन्न नेपाल बार एशोसिएशनको निर्वाचनमा प्रगतिशील तथा पेशागत कानुन व्यवसायी संगठन (पीपीएलए)को तर्फबाट अध्यक्षका उम्मेद्वार वरिष्ठ अधिवक्ता विष्णुमणी अधिकारीले आउँदो निर्वाचन प्रगतिशीलहरुको पक्षमा आउनेमा आफू विश्वस्त रहेको बताए।

प्रगतिशील तथा पेशागत समूहको चुनाबी प्रचारप्रसारका क्रममा चितवनका कानून व्यवसायीहरुलाई सम्बोधन गर्दै वरिष्ठ अधिवक्ता अधिकारीले सो कुरा बताएका हुन्। ‘स्वतन्त्र, निपक्ष र सक्षम न्यायपालिकाको स्थापना आजको आवश्यकता हो, न्यायपालिका भित्रका विकृति, विसंगति र भ्रष्ट्राचार अन्त्य गर्नु हाम्रो कर्तव्य हो, न्यायपालिका भित्रको भ्रष्ट्राचार, बेथिति र विकृतिमा शून्य सहनशीलताको नीतिप्रति हामी हिजो पनि प्रतिबद्ध थियौँ, आज पनि छौँ र भोलि पनि रहनेछौँ,’ वरिष्ठ अधिवक्ता अधिकारीले भने।

प्रगतिशिल कानुन व्यवसायीहरुले आसन्न नेपाल बार एशोसिएशनको निवार्चनका लागि प्रदेश नं. १ र मधेस प्रदेशमा आफ्नो चुनावी प्रचारप्रसारका कार्यक्रम सम्पन्न गरेका छन्।

प्रदेश नं. १ का जिल्ला अदालत बार एशोसिएशन र उच्च अदालत बार एशोसिएशनहरुमा प्रगतिशील तथा पेशागत समूहको चुनावी कार्यक्रम सम्पन्न गरेको प्रचारप्रसार अभियानमा संलग्न महासचिवका उम्मेद्वार अधिवक्ता केदार कोइरालाले बताए।

‘प्रदेश नं. १ का झापा, मोरङ, सुनसरी, धनकुटा जिल्ला अदालत बार एशोसिएशन र विराटनगर उच्च अदालत बार एशोसिएशन, मधेस प्रदेशका सप्तरी, सिराह, धनुषा, महोत्तरी, सर्लाही, रौतहट, बारा, पर्सा जिल्ला अदालत बार एशोसिएशन, जनकपुर उच्च अदालत बार एशोसिएशन, राजविराज उच्च अदालत बार एशोसिएशनका झण्डै ३ हजार कानुन व्यवसायीहरुसँग भेटघाट गरिएको छ, भेटपश्चात प्रगतिशीलको प्रतिबद्धताप्रति कानुन व्यवसायीहरु उत्साहित पायौँ,’ महासचिवका उम्मेदवार कोइरालाले भने। अन्नपूर्ण पोस्ट बाट सभार