बैतडीको दशरथचन्द नगरपालिकामा हुने पाँचौं संस्करणको मेयर कप पुरुष टी–२० क्रिकेट प्रतियोगिताको खेलतालिका सार्वजनिक भएको छ। दशरथचन्द नगरपालिकाको सहयोग र नगर क्रिकेट समितिको आयोजनामा यही फागुन २५ देखि प्रतियोगिता शुरु हुन लागेको हो।
खेलतालिकाअनुसार सहभागी हुने ११ टोलीलाई ४ समूहमा विभाजन गरिएको नगर क्रिकेट समितिका संयोजक रमेश भट्टले जानकारी दिए। समूह ए मा वडा नम्बर ४, ९ र ३, समूह बी मा वडा नम्बर ५, ११ र ७, समूह सी मा १०, २ र १ तथा समूह डी मा वडा नम्बर ६ र ८ रहेका छन्।
उद्घाटन खेलमा फागुन २५ गते वडा नम्बर ४ र ९ भिड्ने भएका छन्। फागुन २६ गते हुने पहिलो खेलमा वडा नम्बर १० र २ भिड्दा दोस्रो खेलमा वडा नम्बर ९ र ३ आमनेसामने हुने छन्।
फागुन २७ गते पहिलो खेलमा वडा नम्बर २ र १ खेल्ने छन् भने दोस्रोमा वडा नम्बर ८ र ६ प्रतिस्पर्धा गर्ने छन्। फागुन २८ गतेकोे पहिलो खेलमा वडा नम्बर ४ र ३ तथा दोस्रो खेलमा वडा नम्बर ११ र ७ भिड्ने छन्। फागुन २९ गते पहिलो खेलमा वडा नम्बर ८ र ६ तथा दोस्रो वडा नम्बर १० र १ बीच भिडन्त हुने छन्। यस्तै फागुन ३० गते पहिलो खेलमा वडा नम्बर ५ र ७ तथा अर्को खेलमा वडा नम्बर ५ र ११ खेल्ने छन्।
प्रतियोगिता अन्तर्गत चैत १ गते सेमिफाइनलका खेल हुने छन्। पहिलो सेमिफाइनलमा समूह ए को विजेता र समूह सी को विजेता भिड्दा दोस्रोमा समूह बी को विजेता र समूह डी को विजेता प्रतिस्पर्धा गर्ने छन्। चैत २ गते प्रतियोगिताको फाइनल खेल हुने नगर क्रिकेट समितिले जनाएको छ।
विजेता टोलीले ७५ हजार र उपविजेता टोलीले ५० हजार नगदका साथै ट्रफी, मेडल र प्रमाणपत्र पाउने जनाइएको छ। नगरपालिकाको वार्षिक कार्यक्रमअनुसार हरेक वर्ष मेयर कप क्रिकेट प्रतियोगिता सञ्चालन हुँदै आएको दशरथचन्द नगरपालिकाका प्रमुख नरेन्द्रसिंह थापाले बताए।
प्रतियोगिताले क्रिकेटको विकासका साथै खेलाडी उत्पादनमा सहयोग मिल्ने विश्वास गरिएको छ। यसअघि गत वर्ष सम्पन्न चौथो संस्करणको मेयर कपको उपाधि वडा नं ५ दशरथचन्दलाई ४ रनले स्तब्ध पार्दै वडा नं ४ खलंगाले हात पारेको थियो।
यसैबीच पाँचौं संस्करणको उपमेयर कप महिला क्रिकेट प्रतियोगिता भने चैत ४ गतेदेखि सञ्चालन हुने नगर क्रिकेट समितिले जनाएको छ। चौथो संस्करणको उपमेयर कप वडा नं २ देहिमाडौंलाई ९ विकेटले हराउँदै वडा नं ६ थालिगडाले जितेको थियो। थाहा खबर बाट सभार
Discussion about this post