दाङ तुलसीपुरमा रहेको जुत्ताचप्पल गोदाममा आगलागी हुँदा ५ जनाको मृत्यु

दाङको तुलसीपुरमा रहेको इरम फुटवेयर जुत्ताचप्पल पसलको गोदाममा आगलागी हुँदा ५ जनाको ज्यान गएको छ ।

बिहीबार राति करिब पौने २ बजे आगलागी हुँदा मानवीय क्षति भएको इलाका प्रहरी कार्यालय तुलसीपुरका डिएसी श्यामु अर्यालले जानकारी दिए ।

चार पुरुष र एक बालिकाको शव फेला परेको उनले बताए । चार तले भवनमा आगलागी भएको हो । शवलाई अस्पताल पठाइएको छ। मृतकहरुको पहिचान भइसकेको छैन ।

राति लागेको आगो तुलसीपुर उपमहानगरपालिका र घोराही उपमहानगरपालिकाको दमकल, प्रहरी, सशस्त्र प्रहरी, नेपाली सेना, स्थानीयबासीले बिहान नियन्त्रणमा लिएका थिए । बिहान पौने दुई बजेतिर गस्तीमा गएको प्रहरीको टोलीले आगो लागेको देखेका थिए। त्यसपछि नियन्त्रणका लागि प्रयास भए पनि करिब ५ घन्टापछि मात्र आगो नियन्त्रणमा आएको छ ।

विद्युत सर्ट भएर आगलागी भएको हुनसक्ने प्रहरीको आँकलन छ ।

केही दिन अगाडि झापाको काँकडभिट्टामा रहेको एसएस फुटवेयरमा आगलागी हुँदा ८ करोड रुपैयाँ भन्दा बढी को क्षति भएको थियो । दिउँसो आगलागी भएको कारण त्यहाँ कुनै मानविय क्षति भने भएन ।

नजिकै रहेको मेचीनगरको दमकल विग्रिएका कारण थप क्षति हुन पुगेको नगरवासिन्दाहरूको आरोप छ । आगो नियन्त्रणमा लिन छिमेकी मुलुक भारतबाट तीनवटा दमकल समेत आएका थिए ।

(केटिएम दैनिकबाट साभार)