नेकपा एमालेका अध्यक्ष केपी शर्मा ओलीले सरकारले निर्णयार्थ पेश गरेको एमसीसी सम्झौता सभामुखले संसदमा रोक्न नमिल्ने बताएका छन् ।
सभामुख अग्निप्रसाद सापकोटाले राष्ट्रिय सहमति नभएसम्म एमसीसी सदनमा टेबल नगर्ने अडान लिएका बेला शुक्रबार ‘स्थानीय तह निर्वाचन प्रशिक्षण तथा अभिमुखीकरण’ कार्यक्रमको शुभारम्भ गर्दै अध्यक्ष ओलीले सरकारले निर्णयार्थ पेश गरेको एमसीसी रोक्छु भन्न नमिल्ने बताएका हुन् । उनले भने, ‘सभामुखले सरकारले निर्णयार्थ पेश गरेको एमसीसीलाई पेश नगरेर रोक्छु भन्न मिल्दैन । यो गठबन्धनको निरीहता हो । सत्ता गठबन्धन चुइक्क बोल्न सक्दैन । संसदले के गर्छ आफ्नो ठाउँमा होला तर, निर्णयार्थ पेश गर्नुप¥यो नि । सभामुखले अनाधिकृत क्रियाकलाप गरे ।’
ओलीले प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालले एमसीसी मुख्यालयलाई पत्र लेख्नु कुटनीतिक मर्यादा विपरीत भएको पनि उल्लेख गरे ।
उनले भने, ‘प्रधानमन्त्रीले एमसीसीलाई पत्र लेख्ने कुरा प्रोटोकल नै मिल्दैन । यो एउटा शाखा वा संस्था त होला । पार्टी होइन । अध्यक्षको हैसियतमा लेख्ने हो भने त रिपब्लिकन पार्टीलाई लेख्नुपर्थ्यो होला । गठबन्धनभित्र पनि दुई जना अध्यक्षले पत्र लेख्नुभएको छ । यो कत्तिको सान्दर्भिक हो ?’ उनले प्रश्न गरे, जनतालाई पास गर्नु हुँदैन भन्छन्, तर पत्र नै एमसीसीलाई पठाएका छन् जसरी पनि एमसीसी पास गर्छौ भनेर । गठबन्धनको न्यूनतम साझा कार्यक्रममा एमसीसीप्रति दृष्टिकोण नै छैन । फरक फरक अभिव्यक्ति दिएका छन् । गैरजिम्मेबार चरित्र देखाएका छन् ।’ अन्नपूर्ण पोस्ट बाट सभार
Discussion about this post