नेपाली कांग्रेसका वरिष्ठ नेता रामचन्द्र पौडेलले सत्तारुढ गठबन्धनलाई कायमै राखेर अघि बढन पार्टी नेतृत्वलाई दबाब दिएका छन्।
एमसिसीको विषयलाई लिएर प्रधानमन्त्री एवं कांग्रेस सभापति देउवा र सत्तारुढ गठबन्धनमा आवद्ध अन्य दलहरुबीच मतभेद भइरहेका बेला वरिष्ठ नेता पौडेलले आगामी निर्वाचन जित्नका लागि पनि सत्तारुढ गठबन्धनलाई निरन्तरता दिएर जान उपयुक्त हुने प्रतिक्रिया दिएका हुन्।
पार्टीले पोखरामा आयोजना गरेको एक कार्यक्रममा बोल्दै सत्तारुढ गठबन्धनकै कारण पार्टीले राष्ट्रियसभा निर्वाचनमा पनि जित हात पार्न सफल भएको दृष्टान्त पेश गर्दै पौडेलले त्यसलाई नकारेर अघि नबढ्न पार्टी नेतृत्वलाई सचेत गराए।
पार्टी कमजोर भएका ठाउँमा अन्य दलसँग मिलेर चुनाव जितिन्छ भने त्यसमा मिलेर किन नजाने ? भनि पार्टी नेतृत्वलाई प्रश्न गरे। कास्कीमा एक्लै चुनाव लडेर जित्न नसकिने भन्दै उनले त्यस्ता ठाउँमा गठबन्धन कायमै राखेर चुनावमा जानुपर्ने तर्क गरे।
उनले भने, ‘कांग्रेस अव जाने कहाँ ? आजसम्म जे गर्दा कांग्रेसले सफलता प्राप्त गरेको छ यसलाई त हामी मान्छौ नि। हामीले प्रधानमन्त्री पद पनि पाएकै हो। हामीले संसदमा आफ्ना ६ जना साथी जिताउन सकेकै हो। हाम्रा ३ जना खाली भएका थिए। ६ जना प्राप्त गर्यौं। त्यो एक्लै पाएको हो ? त्यो पाँच दल मिलेर पाएको हो कि, होइन ?’ पौडेलले एक्लै लडेर चुनाव जितिने ठाउँमा भने पार्टीले एक्लै चुनाव लड्दा हुने पनि बताए।
उनले सत्तारुढ गठबन्धनलाई कायमै राखेर जाँदा कांग्रेसलाई फाइदैफाइदा हुने दाबीसमेत गरे। थाहा खबर बाट सभार
Discussion about this post