कञ्चनपुर – राष्ट्रिय प्रजातन्त्र पार्टी (राप्रपा) कञ्चनपुरले शनिबार महेन्द्रनगरमा मोटरसाइकल र्याली निकालेको छ। आफ्ना नेता तथा कार्यकर्ताहरूको विनाशर्त रिहाइको माग राख्दै सरकारविरुद्ध विरोध स्वरूप र्याली आयोजना गरिएको राप्रपा कञ्चनपुरले जनाएको छ।
राप्रपाले चैत १५ गते काठमाडौंको तिनकुनमा भएको राजावादी आन्दोलनमा हिंसा भड्काएको आरोपमा पक्राउ परेका वरिष्ठ नेता रवीन्द्र मिश्र र महामन्त्री धवलशमशेर जबराको रिहाइको माग गर्दै दबाबमूलक र्याली आयोजना गरेको राप्रपा कञ्चनपुर जिल्ला अध्यक्ष गजेन्द्र बहादुर चन्दले बताए।
महेन्द्रनगरको खुला मञ्चबाट सुरु भएको मोटरसाइकल र्यालीले बजार क्षेत्रको परिक्रमा गरेर कोणसभामा परिणत भएको थियो।
कोणसभालाई सम्बोधन गर्दै राप्रपाका सुदूरपश्चिम प्रदेश अध्यक्ष धर्मराज जोशीले भने, “यो भ्रष्टाचारी सरकारको तानाशाही कार्यशैलीबाट नेपाली जनता निराश भइसकेका छन्। अबको विकल्प राजसंस्था र हिन्दुराष्ट्र हो। यसका लागि आन्दोलनको माध्यमबाट सडकमा जनविद्रोह गर्नुपर्ने अवस्था आएको छ।” उनले शान्तिपूर्ण आन्दोलनको घोषणा भइसकेको र सरकारले त्यसलाई हिंसात्मक बनाउन खोजेमा त्यसको जिम्मेवारी सरकारले नै लिनुपर्ने चेतावनी दिए।
राष्ट्रिय संयुक्त जनआन्दोलन परिचालित समितिका प्रवक्ता तथा वरिष्ठ अधिवक्ता स्वागत नेपालले कोणसभामा बोल्दै महेन्द्रनगरको नाम भीमदत्तनगर जबरजस्ती लाद्न खोजिएको बताएका छन्। उनले चैत १५ गते काठमाडौंमा भएको शान्तिपूर्ण आन्दोलनलाई सरकारले षड्यन्त्रपूर्वक बिथोलेको हल्ला चले पनि कार्यकर्तालाई निराश नहुन आग्रह गरे। “राजसंस्था र हिन्दुराष्ट्रको मागसहित विशेष आन्दोलनको मिति चाँडै घोषणा हुनेछ, त्यस दिनको पर्खाइमा तयार भएर बस्नुस्,” उनले भने।
यसैगरी, राप्रपाका केन्द्रीय सदस्य तथा संगत संस्कृति संयोजक पुष्पराज पुरुषले निषेधित राजनीतिको आयु सकिएको र राजसंस्था स्थापना तथा धर्म–संस्कृति जोगाउन सबै जनसमुदाय एकजुट हुनुपर्ने समय आएको बताए। उनले भ्रष्टाचारी सरकारविरुद्ध आवाज उठाउन सबैलाई अपिल गरे।
मोटरसाइकल र्यालीमा प्रधानमन्त्री र गृहमन्त्री विरुद्ध नाराबाजी गरिएको थियो। र्यालीमा राप्रपा तथा हिन्दुवादी नेता–कार्यकर्ताहरूको बृहत् सहभागिता रहेको आयोजकले जनाएको छ। राप्रपाले सरकारको विरुद्ध आगामी दिनमा थप आन्दोलनका कार्यक्रमहरू घोषणा गर्ने संकेत गरेको छ।
Discussion about this post