कञ्चनपुर – हमास समुहको कब्जामा रहेका नेपाली कञ्चनपुरका विद्यार्थी विपिन जोशीको रिहाईका लागि अनेरास्ववियुले हस्ताक्षर सङ्कलन गरिरहेको छ । सत्तासीन नेकपा एमाले निकट विद्यार्थी सङ्गठन अनेरास्ववियुले कञ्चनपुरमा हस्ताक्षर सङ्कलन गरिरहेको हो ।
अनेरास्ववियु कञ्चनपुरले १० महिनादेखि सुदूरपश्चिम विश्वविद्यालय कृषि विज्ञान सङ्कायका विद्यार्थी हमास समुहको नियन्त्रणमा रहँदासमेत सरकार प्रभावकारी पहल गर्न नसक्दा अझै नियन्त्रणमा भएकाले दवाव सृजना गर्न हस्ताक्षर सङ्कलन अभियान शुरु गरिएको जनाएको छ ।
अध्यक्ष अमर सिह धामीले आतङ्कवादी हमास समुहको कब्जामा रहेका विपिन जोशीको रिहाईका लागि विद्यार्थीबाट हस्ताक्षर सङ्कलन गरिएको बताए । अध्यक्ष धामीले केही दिन थप हस्ताक्षर सङ्कलन गरेर सरकारलाई बुझाइने बताए ।
अनेरास्ववियु कञ्चनपुरका उपाध्यक्ष धर्मराज जोशीले सुप विश्वविद्यालयका विद्यार्थी विपिन जोशीको रिहाईका लागि दवाव दिन हस्ताक्षर सङ्कलन गरिएको बताए । उनका अनुसार सुदूरपश्चिम विश्वविद्यालय केन्द्रीय क्याम्पस महेन्द्रनगरको मूल गेटमै डेस्क राखेर हस्ताक्षर सङ्कलन शुरु गरिएको छ ।
‘हामीले अहिले हस्ताक्षर सङ्कलन गर्दैछौँ, केही दिन पनि यो अभियान सञ्चालन गछौँ, ‘उनले भने, ‘लगत्तै प्रशासन मार्फत सरकारलाई ज्ञापन पत्र सहित हस्ताक्षर बुझाउँछौँ ।’ २० असोज ०८० प्यालेष्टाइनी हमास समुहले इजरायलमा हमला गर्दा त्यहाँ लर्न एण्ड अर्न कार्यक्रम अन्तरगत इन्टर्नसिप गरिरहेका सुप विश्वविद्यालयका विद्यार्थी विपिन जोशी नियन्त्रणमा लिएको र केही मारिएको केही विद्यार्थी घाईते भएका थिए ।
संघीय सरकार, तिनका मन्त्रीहरुले विगतदेखि हमास समुहको नियन्त्रणमा रहेका विपिनको रिहाईका लागि पहल गरिएको आश्वासन दिएको महिनौँ वितिसक्दा पनि परिमाण केही नआएपछि घर परिवार, आफन्त, ईष्टमित्र, साथीभाई विद्यार्थी संघ संगठन चिन्तित बनेका छन् ।
