नेकपा एकीकृत समाजवादीका अध्यक्ष तथा पूर्वप्रधानमन्त्री माधव कुमार नेपालले देशमा केही गर्नेहरू पनि छन् भनेर सम्झनुपर्ने बताएका छन् ।
देशमा केही गरेनन् भन्नुभन्दा पहिले केही गर्नेहरू पनि छन् भनेर सम्झनुपर्ने उनले बताए । धार्चे गाउँपालिका–४ लाप्राकमा भएको पार्टी कार्यकर्ता भेटघाटलाई सम्बोधन गर्दै नेपालले देश विकासका सन्दर्भमा केही भएको र केही गर्न बाँकी रहेको बताए ।
‘जुन जोगी आए पनि कानै चिरेको भन्ने आशयबाट एकजना वक्ताले बोल्नुभयो,’ उनले भने,‘मान्छेले गुन पनि बिर्सँदा रहेछन्, बुढापाकालाई नेपालमा भत्ताको व्यवस्था कसले ग¥यो ? सोध्ने हो भने त्यो बेलाको पार्टीको नाम आउँछ, जसको नेता माधव नेपाल थिए, सारा देशले सम्झिरहेको छ, मनमोहन अधिकारी प्रधानमन्त्री, माधव नेपाल उपप्रधानमन्त्री, पार्टीको तर्फबाट मूल नेता, भत्ताको व्यवस्था सुरु गर्ने मान्छे नै म यहीँ आएको छु, यादै छैन, कमसेकम स्याबास् भन्नुपर्ने हो नि !’
एक सय रुपैयाँबाट सुरु गरेको भत्ता अहिले तीन हजार पुगेको र भोलि पाँच हजार पु¥याउने विषयमा गदगद हुनुपर्ने भन्दै उनले आफूले जनपक्षीय काम गरेको बताए । ‘ह्रदय गदगद गदगद भएको छ भन्नुपर्ने होइन, कमसेकम स्याबास् भन्नुपर्ने हो नि,’ उनले भने ।
नेता नेपालले २०५१ सालको सरकारले थुप्रै जनपक्षीय काम गरेको स्मरण गर्दै आफूले आशावादी हुनुपर्ने बताएका थिए । ‘२०५१ सालको सरकारले देशका चार हजार गाउँलाई सम्झियो, एकैचोटी सम्झियो, आफ्नो गाउँ आफैं बनाऔं भनेर तीन लाख दिएका थियौं, तीन लाखले तीन करोडको काम भएको छ,’ उनले भने, ‘आफ्नो गाउँ आफैं बनाऔं अभियान सुरु गर्ने पनि मै नै हो क्यार !’
यस्तै सुत्केरी, विधवा महिलालाई भत्ताको व्यवस्था गर्ने जस्ता जनपक्षीय काम आफ्नो सरकारको पालामा भएको नेपालको भनाइ थियो । ‘कसैले केही गरेन, कसैले केही गरेन भनेर भन्नु भन्दा गर्ने पनि छन् भन्नुप¥यो, सभ्झाइदिएको मात्र हो,’ नेपालले भने, ‘जनताको घर नभएको मान्छेलाई घरको व्यवस्था गर्ने पनि मै हुँ, मैले अघि सारेको कार्यक्रमको नाम के हो थाहा छ– जनता आवास कार्यक्रम । घर नभएकालाई राज्यले घर बनाएर दिने ।’ हरिराम उप्रेतीले ekantipur.com मा लेखेका छन्।
Discussion about this post