बैतडीको दशरथचन्द नगरपालिकामा मेयर पुरुष र उपमेयर महिला कप टी–२० क्रिकेट प्रतियोगिता हुने भएको छ। नगरपालिकाले हरेक वर्ष गर्दै आएको प्रतियोगिताको यो पाँचौं संस्करण हो। पाँचौं संस्करणको मेयर कप क्रिकेट प्रतियोगिता फागुन २२ गतेदेखि हुनेछ भने उपमेयर कप क्रिकेट प्रतियोगिता आगामी चैत ४ गतेदेखि हुने जनाइएको छ।
दशरथचन्द नगरपालिकाको सहयोग तथा नगर क्रिकेट समितिको आयोजनामा हुने दुवै प्रतियोगितामा नगरका ११ वटै वडाको सहभागिता रहनेछ। प्रतियोगिताका खेलहरू सुन्दरखाली खेल मैदान र निंग्लाशैनी खेलमैदानमा हुने नगर क्रिकेट समितिका संयोजक रमेश भट्टले जानकारी दिए। मेयर कप विजेता टोलीले ७५ हजार र उपविजेता टोलीले ५० हजार नगद, ट्रफी, मेडल र प्रमाणपत्र पाउने जनाइएको छ। उपमेयर कप विजेताले ४५ हजार र उपविजेताले ३० हजार नगद, ट्रफी, मेडल र प्रमाणपत्र पाउनेछ।
नगरपालिकाको वार्षिक कार्यक्रमअनुसार हरेक वर्ष मेयर र उपमेयर कप क्रिकेट प्रतियोगिता हुँदै आएको दशरथचन्द नगरपालिकाका प्रमुख नरेन्द्रसिंह थापाले जानकारी दिए। प्रतियोगिताले क्रिकेटको विकासका साथै खेलाडी उत्पादनमा सहयोग मिल्ने विश्वास रहेको नगर उपप्रमुख मिना चन्दले बताइन्।
यसअघि गत वर्ष भएको चौथो संस्करणको मेयर कपको उपाधि वडा नं ५ दशरथचन्दलाई ४ रनले हराउँदै वडा नं ४ खलंगाले हात पारेको थियो। चौथो संस्करणको उपमेयर कप वडा नं २ देहिमाडौंलाई ९ विकेटले हराउँदै वडा नं ६ थालिगडाले जितेको थियो। थाहा खबर बाट सभार
Discussion about this post