घर निर्माणको सुचिमा नाम छुटेपछि हावाहुरी प्रभावित पीडित महिलाहरु बाराको फेटा गाउँपालिका कार्यालयमा तालाबन्दी गर्न पुग्दा सोमबार झडप भएको छ ।
फेटा गाँउपालिका १ भरवलियाका हावाहुरी पीडित महिलाहरु गाँउपालिमा तालाबन्दी गर्न समुह बनाएर पुगेका थिए ।
गत चैत १७ गते आएको हावाहुरी पीडितलाई सरकारले घर बनाइदिने भनेको थियो । घर निर्माण गर्ने सूचीमा नाम नसमेटेको भन्दै आन्दोलित भएर उनीहरु तालाबन्दी गर्न गाउँपालिका पुगेका हुन् ।
तालाबन्दी गर्न खोज्दा गाँउपालिका अध्यक्ष समर्थकले रोक्न खोजेपछि झडप भएको हो । दोहोरो झडप हुन थालेपछि सुरक्षाकर्मीले हस्तक्षेप गरि रोकेका थिए ।
फरक राजनीतिक आस्था राख्नेलाई वडाध्यक्ष र गाउँपालिका अध्यक्षले घर निर्माणको सूचीमा सिफारिश नगरेको स्थानीय मिना देवीले आरोप लगाईन । गाँउपालिकाका अध्यक्षले आफना निकटलाई मात्र घर बनाउनका लागी सिफारीस गरेको आरोप पीडितहरुको छ । स्थानीय विगनी देवी, फुलवा देवी, गीता देवीलगायतका सय भन्दा बढी पीडितहरु अझै पाल र भत्केको घरमा बसिरहेका छन् ।
पहिला सबैको नाम पूर्ण क्षति भएको सूचीमा उल्लेख भएपनि गृह मन्त्रालयबाट आएको सुचीमा सय जनाको नाम हटाइएको पीडित मीना देवीले बताइन् । घर भत्केर खुल्ला आकासमा सुत्नु पर्दा पनि राज्ले नदेखेपछि गाउँपालिकामा तालाबन्दी गर्न गएको उनको भनाई छ । -नयाँ पत्रिका
